भांगरभूंय | प्रतिनिधी
अहमदनगर, खबरां संस्था : भारतीय जनता पार्टीचे महाराष्ट्र प्रदेशाध्यक्ष चंद्रशेखर बावनकुळेन काल भाजपाचे जाळवणदार आनी बूथ वावुरप्यांचे बसकेंत एक अजब सल्लो दिलो.
‘पत्रकारांनी 2024 मेरेन आमच्या विरोधांत (भाजपा) बातम्यो छापच्यो न्हय, हे खातीर तांकां च्या पिवपाक व्हरात. च्या पियेवपाक व्हरचें म्हणल्यार कितें तें तुमकां कळ्ळांच आसतलें. तशेंच पत्रकारांक ढाब्याचेर जेवपाक घेवन वचात.’ असो सल्लो तांणी पक्ष वावुरप्यांक दिलो. हाची ऑडियो क्लीप व्हायरल जाल्या.
सावेडी हांगाच्या माऊली सभाघरांत आयतारा ही बसका जाली. लोकसभा वेंचणुकेचें धोरण आंखपा खातीर तांणी ती आपयिल्ली.
‘ज्या बुथाचेर तुमी काम करतले, थंय इलेक्ट्राॅनिक मिडीयावाले कोण आसात, पोर्टलवाले कोण आसात, तें पळोवचें. आमी इतलें बरें काम करतात, पूण हे अशें कितें तरी घालतात की गांवांत जणू बाॅम्बूच फुटला. हे खातीर बुथाचेर जे ४- ५ पत्रकार आसा, तांची यादी तयार करात. हातूंत एक- दोन पोर्टलवाले, प्रिंट आनी इलेक्ट्राॅनीकवाले आसतले. तांकां म्हयन्यांतल्यान एकदां च्याक आपयात. म्हणजे कितें तें समजलांच आसतलें तुमकां. तातूंत कितें कमी जास्त जालें जाल्यार सुजय विखे आसातूच. आमकां सकारात्मकताय जाय, नेगेटिव्हीटी नाका, अशेंय श्री. बावनकुळे हांणी म्हणिल्ल्याचें ऑडियो क्लिपांत आयकूपाक येता.
ही क्लीप व्हायरल जातकच, आतां बावनकुळे हांणी स्पश्टीकरण दिलां – देशांत खूब व्हडल्यो, बऱ्यो घडणुको घडटात, तरी न्हयकारात्मक खबरो येतात. तेन्ना तांकां च्याक घेवन वचात, वस्तुस्थिती, सत कितें तें सांगात, अशें हांवें म्हणिल्लें. पत्रकार हे समाजांतलें व्हडलें स्थान. चवथो स्तंभ तो. पत्रकारांक समाजांत कितें घडटा तें खबर आसता. पत्रकारांक खरें सांगप, तांचे कडल्यान इनपुट घेवप. कारण तांचे कडल्यान समाजांतलें सत्य कळटा. ताका लागून पत्रकारांक मानान वागयात, अशेंय तांणी सांगलें. पत्रकार हो समाजाचें मत आनी मन बदलूंक शकता. तुमी बुथ वावुरपी तांकां मेळचेच नात, तांचें मत जाणून घेवचेच नात. जाल्यार कशें जातलें? पत्रकार परिशद सोंपतकच तांकां च्याक घेवन वचात, अशें सांगप हातूंत चुकीचें कितें आसा, असो प्रस्न बावनकुळे हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
