मयड्यां फातर आपटून आवय- पूत जखमी

भांगरभूंय | प्रतिनिधी

म्हापशें ः मयड्यां एका खाजगी जाग्यार राखणे वणट बांदपा खातीर जमीन खणपाचें काम चालू आसा. ह्या कामा वेळार व्हडलो फातर रस्त्यार येवन तो एक गाडयेक आपटलो. ह्या अपघातांत दोन चाकी चलोवपी आवय आनी तिचो पूत जखमी जालो.

ही घडणूक बिरेस्तारा सकाळीं घडली. स्मृती केरकार आनी तिचो 9 पिरायेचो पूत जखमी जाला. तांचेर हळदोणा भलायकी केंद्रांत उपचार करून घरा धाडलीं. पुताक शाळेंतल्यान घरा व्हरतना हो अपघात घडलो. हे घडणुकेचो व्हिडिओ सोशल मिडियाचेर व्हायरल जाला.

हे घडणुके विशीं मेळिल्ले म्हायती प्रमाण, मयडें पुला लागसारच्या रस्त्या कुशीक आशिल्ल्या खाजगी जमनीचेर व्हिला प्रकल्पा खातीर राखणे वणट बांदपाक संबंदितांनी जेसीबी वरवीं जमीन खणपाचें काम सुरू केलां. रस्त्या कुशीक तांणी पत्रेय घातल्यात. जमीन खणटना एक फातर पत्र्याक पडिल्ल्या बुरकांतल्यान रस्त्यार आयलो आनी जखमी जाल्ल्यांचे दोन चाकीक आपटलो. फातर आपटतांच चालकाचें दोन चाकी वेल्यान नियंत्रण वचून ती आनी तिचो पूत रस्त्यार कोसळ्ळीं. ही घडणूक घडटांत आशिकुशीचे लोक घडणुके सुवातेक एकठांय जाले. तांणी खणपी कामगारांक जाप विचारली तेन्ना ते थंयच्यान पळ्ळे.

जखमींक मुळाव्या भलायकी केंद्रात व्हरून तांचेर उपचार केलो आनी तांकां घरा धाडलीं. म्हापशें पुलीस हवालदार केशव नायक हांणी पंचनामो केलो. पुलिसांनी हें प्रकरण हेर अपघात म्हणून नोंद केलां.