भांगरभूंय | प्रतिनिधी
मडगांव: मनशाची तस्करी ही फक्त कुडीचे विक्रे खातीर जाता अशें न्हय. जाल्यार बालमजुरी, अवयवांचे तस्करी खातीरूय जायत आसता. गोंयांत अवयव तस्करीचे प्रकार दिसून आयले नात पूण सेक्स रॅकेटाचें प्रकार उक्तडार आयल्यात. तातूंत लेगीत गोंया भायल्या लोकांचो वांटो चड दिसून येता. हे प्रकार आडावपा खातीर लोकजागृताय करप होच पर्याय आसा अशें मत गोंय राज्य महिला आयोगाच्यो अध्यक्ष रंजिता पै हांणी उक्तायलें.
संवसारीक मनीस तस्करी आडच्या दिसा निमतान उलयतना राज्य महिला आयोगाच्यो अध्यक्ष रंजिता पै हांणी सांगलें, फक्त लिंगीक संबंदा खातीरूच न्हय जाल्यार बालमजुरी, अवयवया खातीरूय मनशाची तस्करी जायत आसता. भुरग्यांची आनी बायलांची तस्करी लेगीत खूब सोंपी आशिल्ल्यान ती जाता. गोंयांत अवयवा खातीर तस्करीचे प्रकार आतां मेरेन दिसून आयिल्ले नासले तरी लेगीत हेर राज्यांतल्यान हे प्रकार सुरू आशिल्ल्याचें घडिल्ल्या घडणुकां वयल्यान दिसून येता. पयशां खातीर अवयव काडटात. कांय वेळा पॅशंटाक ऑपरेशना खातीर व्हरतकूच अवयव काडून त्या अवयवांची तस्करी करपाचे प्रकारूय घडत आसतात.
मुखार उलयतना तांणी म्हणलें, गोंय हें पर्यटन राज्य आसा. ताका लागून सेक्सा खातीर मनशाचे तस्करीचे प्रकारूय उक्तडार आयल्यात, आनी हाचो वायट परिणामूय गोंयच्या पर्यटनाचेर जाता. अशे तरेची मनीस तस्करी गोंयच्या मनशां परस गोंया भायल्या मनशांचो हात व्हड प्रमाणांत आशिल्ल्याचें दिसता. गोंय पुलिसांनी ज्या ज्या वेळार सेक्स रॅक्ट उजवाडा हाडलां त्या वेळार अशा घडणुकांनी गोंया भायल्यान आयिल्ल्या मनशांचो हात चड आशिल्ल्याचें दिसून येता. येरादारीची साधनां गोंयांत बरीं आशिल्ल्यान गोंया भायल्यान येवप, मनीस तस्करी करप आनी परतून गांवघरा वचप हें सोंपें जालां. अशे प्रकार आडावपा खातीर चडांत चड लोकजागृताय जावपाची गरज आसा. तरणाट्यां मदीं हाची जागृताय केल्यार अशे प्रकार आडावं येतात अशें पै हांणी सांगलें.
सुटके उपरांतूय पुनर्वसन गरजेचें: पै
सेक्स रॅकेटांतल्या बायलांक वा चलयांक फक्त सोडोवप म्हणल्यार सगलें कितें जालें अशें ना. तांकां दलालाच्या ताब्यांतल्यान मुक्त केले उपरांत तांचें पुनर्वसन लेगीत गरजेचें आसता. खंयचोय मनीस आपले मर्जीन शिंदळकी वेवसायांत येना. खंयच्या ना खंयच्या कारणाक लागून तांकां तशे करप भाग पडटा. कांय कुटुंबांच्या उदरनिर्वाह लेगीत ह्या वेवसायाचेर आशिल्ल्यान तांकां परतून अर्थीक साधन उपलब्ध करून दिवपाची गरज आसता. हे खातीर गोंयांत अर्ज ही संस्था सरकाराच्या सहकारांतल्यान कार्य करता. फुडले पिळगेक बरें कितेंय दिवपाचें आसल्यार गोंयांतल्या वायट प्रकारा विशीं लोकजागृताय करपाची गरज आसा. लोकजागृतायेक लागून मनीस तस्करीचे प्रकार आडावं येतात. तशें हे प्रकार उणें जावंक शकतात अशें रंजिता पै हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
