भांगरभूंय | प्रतिनिधी
विजय सरदेसाय: जनावरां शाराचे दिकेन; रानांनी पाणटे तयार करपाची गरज
पणजी: मंत्री आसतना उदका स्रोत खात्याक रानांतल्या जनावरां खातीर पाणटे तयार करपा खातीर सांगिल्लें. जनावरांक गरजेचे उदका सांठे आनी स्रोत मेळ्ळ्यार जनवरां रानांतल्यान भायर सरचीं नात. मनशां कडल्यानूच रानांत अतिक्रमण जायत आशिल्ल्यान रानवटी जनावरां मनशाचे वस्तींत येत आशिल्ल्याचें गोवा फॉरवर्डाचे अध्यक्ष विजय सरदेसाय हांणी सांगलें.
वुई फॉर फातोड्डा वतीन काल (आयतारा) सकाळीं सुमार दोन हजार फळांचे रोंपे आनी वखदी रोंपे लोकांक वांटले. हे कार्यावळी उपरांत उलयतना सरदेसाय हांणी म्हणलें, रानां आशिल्ले गांव आतां शाराचें रूप घेवंक लागल्यात. हाका लागून जनावरां लोकवस्तींत येवंक लागल्यांत. रानांनी उजो लागूंक लागला. गोंयांतल्या रानांनी लागिल्लो उजो हो सैमीक न्हय जाल्यार मनीस निर्मीत आशिल्ल्याचें मुख्यमंत्र्यांनीच सांगलां. ताका लागून रानवटी जनावरांक हेर कडेन वचपा बगर दुसरो पर्याय ना. जनावरां आतां शाराचे दिकेन येवंक लागल्यार ती चूक कोणाची हें समजून घेवप गरजेचें आसा.
वाग प्रकल्प करपाचे निर्देश गोंय पिठान दिल्यात. ह्या आदेशाचो आदर राखपाची गरज आसा. गोंय सरकाराक सर्वोच्च न्यायालयांत अपील करपाचें आसत जाल्यार सरकार करूंक शकता. पूण ते खातीर विधानसभेंत भाशणां केली म्हूण कांयच जावचें ना.
कायदो सुवेवस्था इबाडल्या
आमदार विजय सरदेसाय हांणी आयतारा अंबाजी फातोड्ड्यां कुशिल्लो हात मेळिल्लो थंयचे सुवातेची पळोवणी केली. उपरांत उलयतना तांणी म्हणलें, गोंयांतलो कायदो आनी सुवेवस्था इबाडल्या. कुशिल्लो हात सांपडलो पूण कूड सांपडली ना. कोण बेपत्ता आशिल्ल्याची कागाळूय ना. हो खून काय आनीक कितें हाची खबर ना. शांततायपूर्ण फातोड्डें वाठारांत लोकां मदीं भिरांत निर्माण जायत आसा. ही हुस्क्याची गजाल. हे विशीं विधानसभेंत आवाज काडटलों. येरादारी पुलीस, पुलीस कर्मचाऱ्यांचो उणाव ह्या विशयांचेरूय उलयतलों अशें सरदेसाय हांणी स्पश्ट केलें.
मॅडिकल कॉलेज नाका, एम्स गरजेचें
दिगंबर कामत मुख्यमंत्री आसतना दक्षीण गोंय जिल्हो हॉस्पिटल बांदिल्लें. कोट्यांनी रुपयांचो खर्च केले उपरांत आतां सरकार थंय खाजगी मॅडिकल कॉलेज हाडूंक पळयता. हाचेर कामत हांणी आपली भुमिका स्पश्ट करची. केंद्रा कडल्यान देशभरांत एम्सची उबारणी जायत आसतना गोंय सरकार सरकारी इमारती खाजगी कॉलेजी खातीर दितना दिसून येता. लोकांक मॅडिकल कॉलेज नाका जाल्यार बऱ्यो सुविधा जाय. ते खातीर गोंय सरकारान यत्न करून दक्षीण गोंयांत एम्स हाडचें अशी मागणी आमदार सरदेसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
