मणिपूर थारावाचेर सभाघरांत परतून बोवाळ
भांगरभूंय | प्रतिनिधी
चर्चेची मागणी करपी थाराव सभापतींनी भायरायलो
पणजी : मणिपूर हिंसाचाराचेर सभाघरांत चर्चा करपाचे मागणेचो विरोधी आमदारांचो थाराव सभापती रमेश तवडकार हांणी भायरायलो. हो थाराव चर्चेक घेवचो अशी मागणी काँग्रेस तशेंच आपाच्या आमदारांनी केली. विरोधी आमदार सभापती मुखार आशिल्ल्या जाग्याचेर गेल्ल्यान सभाघरांत बोवाळ जालो. थाराव चर्चेक घेतलो ना, म्हणून सभात्याग करून काँग्रेस, आप आमदारांनी विधानभवनाच्या प्रवेशदाराचेर धरणें आंदोलन सुरू केलें.
शुक्रारा सकाळीं प्रस्नोत्तराचो तास जाले उपरांत विरोधी पक्ष फुडारी युरी आलेमांव हांणी झिरो आवराक मणिपूर चर्चेचो थाराव घेवपाची मागणी केली. शुक्रारा खासगी कामकाज दिसा वेळार थाराव चर्चेक घेतां, अशें आस्वासन सभापतींनी दिल्लें, असो उल्लेख विरोधी पक्ष फुडार्यांनी केलो. गोंय हो शांत प्रदेश आसा. मणिपूर हिंसाचाराचो विशय सर्वोच्च न्यायालयांत आसा. हांवें हो थाराव भायरायला, असो निर्णय सभापती रमेश तवडकार हांणी दिलो.
गोंय हो शांत वाठार आसा. जातीय सलोखो गोंयात आसा. प्रस्न सर्वोच्च न्यायालयात आसा. थाराव चर्चेक घेवन आमकां शांतिकाय इबडपाची ना, अशें निवदेन मुख्यमंत्री डॉ. प्रमोद सावंत हांणी केलें.
दनपरांय काँग्रेस आनी आप आमदारांनी थाराव चर्चेक घेवपाची मागणी केली. सभापतींनी न्हयकार दिल्ल्यान युरी आलेमाव, एल्टन डिकोस्ता, विरेश बोरकार, क्रुज सिल्वा आनी वेंझी व्हिएगस हांणी विधानभवना भायर धरणें धरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
