भांगरभूंय | प्रतिनिधी
विजयाचें दिगंबर कामत हांकां लोहिया मैदानांत चर्चेच येवपाचें आव्हान
मडगांव, प्रतिनिधी ः प्रकल्पांच्या नांवान जमीन संपादीत केल्या. मास्टर प्लॅनाच्या नांवान ह्योच संपादीत जमनी विकासकामांक दिवन त्यो मागीर हडप करपाचो कट रचला. मास्टर प्लाना संबंदीं आमदार दिगंबर कांमत हांणी लोहिया मैदानाचेर येवन उक्ती चर्चा करची अशें आव्हान फातोड्डेंचे आमदार विजय सरदेसाय हांणी दिलें.
सरदेसाय हांणी पत्रकार परिशद घेतली आनी लोकांक विस्वासांत घेवन मडगांवचो मास्टर प्लान करप गरजेचें आसा अशें सांगलें. पूण, हांगा फकत जमीन हडप करपाचो यत्न आसा असो गंभीर आरोप केलो.
फातोर्ड्डेंच्या शेतकार आपल्या जमनीचो एक इंच लेगीत हडप करुंक दिवचे नात. प्रकल्पांच्या नांवान जमीन संपादीत करून जमनी हडप करपाचो यत्न सुरू आसा अशें आमदार सरदेसाय हांणी सांगलां. लोहिया मैदानांत येवन मास्टर प्लान संबंदीं उक्ती चर्चा करची. उदरगतीची येवजण बंद दारां फाटल्यान तयार करची न्हय. लोकांक कितें जाय तें जाणून घेवन एक नदर आसप आनी येवजण करप गरजेचें. रामराज्यांत लोकांच्या मतांक मोल मेळटालें. लोकांक कितें जाय तें जाणून घेवन दूरदृश्टीन आराखडो केल्यारुच रामराज्य येतलें. देवळां निवळ करून न्हय असो आमदार सरदेसाय हांणी थोमणो मारलो.
कामतीं कडल्यान उदरगतीच्या कामांत आडमेळीं
फातोड्डेंच्या फुटसाल मैदानाचें काम मतदारसंघांतल्या भुरग्यांच्या आनी खेळगड्यां खातीर करतात. फातोड्डेंच्या उदरगतीच्या कामांत आडमेळीं हाडपाचे यत्न आमदार कामत करतात. आदीं पार्किंग प्रकल्प आनी आतां फुटसाल मैदानाच्या कामांक आडमेळीं येतात. तशें जालें जाल्यार लोक कामताच्या घरा मोर्चा व्हरून विचारतले अशी शिटकावणी आमदार विजय सरदेसाय हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
