भांगरभूंय | प्रतिनिधी
लोकसभा वेंचणुकेंत दोनूय सुवातांनी भाजपाक तेंको
पणजी: मुजत सोंपिल्ल्यान मगो पक्षाच्या मतदारसंघ समित्यां सयत कार्यकारी समिती लेगीत बरखास्त केल्या. लोकसभा वेंचणुके उपरांत ह्या सगल्या समित्यांची परतून स्थापणूक करतले अशें मगो पक्षाचे अध्यक्ष दीपक ढवळीकार हांणी स्पश्ट केलें. मगोची सद्या भाजपा कडेन युती आसा. ताका लागून लोकसभा वेंचणुकेंत भाजपाच्या दोनूय उमेदवारांक मगोचो पुराय तेंको आसतलो अशेंय तांणी जाहीर केलें.
पणजेंतल्या पक्ष कार्यालयांत आयतारा घेतिल्ले पत्रकार परिशदेंत ते उलयताले. ह्या वेळार तांचे सयत केंद्रीय समितीचेर हेर पदाधिकारी हाजीर आशिल्ले. मगो पक्षाच्या मतदारसंघ समित्याची मुजत कांय म्हयन्यां पयलीं सोंपिल्ली. ताका लागून त्यो सगल्यो समित्यो बरखास्त केल्यात. नरेश सावळ हांणी राजिनामो दिले उपरांत कार्यकारी समितीय बरखास्त केल्या. लोकसभा वेंचणूक तोंडार आयिल्ल्यान तत्काळ ह्या समितीची स्थापणूक परतून करप शक्य ना. ताका लागून हे वेंचणुके उपरांत सगल्या समित्यांची परतून स्थापणूक करतले अशें ढवळीकार हांणी म्हणलें.
मगो हो राज्यांतलो सगल्यांत पोरणो पक्ष आसा. मगोच्या उमेदवारीचेर हाचे पयलीं खूबशे जाण आमदार म्हूण वेंचून आयले आनी गेले. पूण ताचो पक्षाचे कार्यकर्ते वा मतदारांचेर कसलोच परिणाम जाल्लो ना. अजून लेगीत मगो कडेन सुमार 13 टक्के मतदार आसात. ताचो भाजपाच्या लोकसभेंतल्या उत्तर आनी दक्षीण गोंयांतल्या सुवातां खातीर निश्चीतपणान फायदो जातलो अशेंय तांणी म्हणलें.
मजगतीं, मगो पक्षाच्या पदाधिकाऱ्यांनी विचार करून उलोवचें. पक्षांत बेशिस्तपणां खबोवन घेवचे नात. जे बेशिस्त उलयतले तांचेर कारवाय करतले अशी शिटकावणी दीपक ढवळीकार हांणी दिली.
ईव्हीएमाक विरोध हें राजकारण
कांय विरोधी राजकी पक्ष तशेंच आपसेवी संस्था कडल्यान ईव्हीएमाक विरोध करतात. लोकसभा वेंचणूक बॅलट पेपराचेर घेवची अशी मागणी लेगीत तांचे कडल्यान जायत आसा. हे विशीं पत्रकारांनी दीपक ढवळीकार हांकां विचारलें तेन्ना, हें सगलें राजकारण आशिल्ल्याचें तांणी सांगलें. कर्नाटक, तेलंगणांत काँग्रेसीचें, जाल्यार दिल्ली, पंजाबांत आपाचें सरकार आयलां. थंय ईव्हीएम मशिनाचो वापर जावंक नाशिल्लो असोय प्रस्न तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
