भांगरभूंय | प्रतिनिधी
वास्को: मंदा आनी नारायण बांदेकार चॅरिटेबल ट्रस्टा वतीन वास्को पुलीस स्टेशनाक एम्बुलन्स दिली. काल (शुक्रारा) सकाळीं एका सुवाळ्यांत उद्देजक नारायण बांदेकार हांणी वास्कोचे पुलीस उपअधिक्षक सलीम शेख हांकां एम्बुलन्सीची चावी भेटयली. समाजीक, भलायकी, गरजेवंतांक आदार करपाक मंदा आनी नारायण बांदेकार चॅरिटेबल ट्रस्ट सदांच तयार आसता अशें बांदेकार हांणी सांगलें.
ह्या वेळार वास्कोचे पुलस निरिक्षक कपील नायक, येरादारी पुलीस निरिक्षक शैलेश नार्वेंकार, मुरगांव हिंदू समाजाचे उपाध्यक्ष शेखर खडपकार हाजीर आशिल्ले. बांदेकार हांचे हस्तुकीं विवीधवत पुजा केली. तांणी आपल्या ट्रस्टाची म्हायती दिली. हो ट्रस्ट मंदाताई हांणी स्थापन केल्लो. ह्या ट्रस्टा वतीन फक्त गोंयांतूच न्हय जाल्यार महाराष्ट्र, कर्नाटक राज्यांतल्या गरजेवंतांक मजत करतात अशें तांणी स्पश्ट केलें.
सलीम शेख हांणी पयलींची एब्मुलन्स दुरुस्तीचे पलतडी गेल्ल्यान एम्बुलन्सीची सामकी गरज आशिल्ली अशें सांगलें. उद्देजक नारायण बांदेकार हांचे कडल्यान रोखडोच प्रतिसाद मेळिल्ल्यान नवी एम्बुलन्स मेळळी. हे एम्बुलन्सीचो वापर वास्को, मुरगांव, वेर्णे, रेल्वे पुलीस, दाबोळी विमानतळ पुलीस स्टेशनां खातीर करतले अशें तांणी स्पश्ट केलें.
वास्को उपविभागीय पुलीस क्षेत्रांत 2020-21 वर्सा 174, 2021-22 वर्सा 185 जाल्यार 2022-23 वर्सा 174 असैमीक मरणांची नोंद जाल्ली. असैमीक मरणाची नोंद जाता तेन्ना कूड व्हरपा खातीर एम्बुलन्सीची गरज आसता. हे एम्बुलन्सीक लागून ती गरज पुराय जाल्ल्याचें शेख हांणी म्हणलें.
ह्या वेळार शैलेश नार्वेंकार, शेखर खडपकार हांचींय उलोवपां जालीं. कपील नायक हांणी उपकार मानले. दामू मयेंकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
