भांगरभूंय | प्रतिनिधी
14 दिसाची न्यायालयीन बंदखण
म्हापशें, प्रतिनिधी ः पुंडलिकनगर- पर्वरे भौशीक सुवातेर तरणाट्या वांगडा आक्षेपार्ह कृत्य करपी तरणाटेक आडावंक गेल्ल्या पुलीस हवालदाराक ते चलयेन धक्काबुक्की केल्ल्याचो प्रकार उजवाडाक आयला. ह्या प्रकरणांत पर्वरें पुलीस हवालदार अक्षय मांद्रेकार हांणी कागाळ केले उपरांत आफ्रीना शेख (25, फोंडें) हिका अटक केल्या. म्हापशें न्यायालयान तिका 14 दीस न्यायालयीन बंदखणीत दवरपाचो आदेश दिलो.
हवालदाराचे कागाळी प्रमाण, वयली घडणूक 20 तारखेक दनपरां देडांक घडली. पुंडलीक नगरांतल्या नियोजन आनी सांख्यिकी कार्यालयाचे इमारती लागसार भौशीक सुवातेर एक जोडपें नाका जाल्लें करता, असो फोन पर्वरें पुलिसांक आयलो. ते प्रमाण हवालदार मांद्रेकार गस्ती वाहनांतल्यान ते सुवातेर गेलो. थंय पुलिसांनी त्या जोडप्याक जाब विचारले उपरांत दोगांयनी वाद घालपाक सुरवात केली. उपरांत तरणाटे चलयेन, ‘आमी कितेंय करतलीं. तुमकां कितें करपाचें आसा?’ अशें म्हणून हवालदाराक धक्काबुक्की केली. थंय हाजीर आशिल्ल्या प्रसाद सावंताचो मोबायल काडून भायर मारलो. गस्त घालपी गाडयेचेर गुंडो मारलो.
वयले घडणुके उपरांत मांद्रेकारान आफ्रिना आड पुलीसांच्या कामात आडमेळीं हाडिल्ल्याची कागाळ दाखल केली. मागीर आफ्रीनाक न्यायालयांत हाडून 14 दिसांची न्यायालयीन बंदखण दिली. सध्या ती कोलवाळ बंदखणीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
