भांगरभूंय | प्रतिनिधी
कोची, खबरां संस्था ः भारत माता की जय म्हणपाक न्हयकार दिवपी केरळांतल्या नागरिकांचेर केंद्रीय मंत्री मीनाक्षी लेखी हांणी आपलो राग उक्तायलो. कोझीकोडांतल्या एका युवा संमेलनांत ती उलयताली. हे बसकेंत तिणें उपस्थित लोकांक ‘भारत माता की जय’ घोशणा दिवपाक सांगलें. पूण गर्देंतल्या कांय जाणांनी घोशणा दिवपाक न्हयकार दिलो. हाका लागून मीनाक्षी लेखी हांणी तिडक उक्तायली.
‘भारत माता की जय’ म्हणपाक न्हयकार दिवपी लोकांक मीनाक्षी लेख हांणी विचारलें, भारत तुमची आवय न्हय? तशेंच तिणें घोशणा दिवपाक न्हयकार दिल्ले एके बायलेकूय थंयच्यान भायर वचपाक लायलें. ह्या संमेलनाचें आयोजन दक्षिणपंथी संघटणेन केल्लें.
मीनाक्षी लेखीन भाशण सोंपयतना ‘भारत माता की जय’ अशी घोशणा केली. मात, तिका हाजीर आशिल्ल्या लोकां कडल्यान उणो प्रतिसाद मेळ्ळो. देखून तिणें सरळ विचारलें, भारत तुमचें घर न्हय? भारत फकत म्हजी आवय कित्याक? काय तुमचीय आवय? कितें आडखळ आसा?
सुरवातेक उणो प्रतिसाद मेळ्ळ्या उपरांत मिनाक्षी लेखी हिणें परत ‘भारत माता की जय’ची घोशणा दिली. मात तेन्नाय उणो प्रतिसाद मेळ्ळो. तशेंच तांच्या दावे वटेन बशिल्ल्या लोकां कडल्यान उणो प्रतिसाद मेळटालो. तेन्ना एके बायलेक बोट दाखोवन तिणें म्हणलें, हळदुव्या रंगाची साडी न्हेंशिल्ले बायलेन उबें रावचें. आगो, हांगा- थंय पळोवं नाका. हांव तुजेच कडेन उलयतां. हांव तुकां डायरेक्टुच विचारतां, भारत तुजी आवय न्हय? हो ऍटीट्युड कित्याक?
अशे प्रस्न केल्या उपरांतूय ते बायलेन ‘भारत माता की जय’ची घोशणा दिवपाक न्हयकार दिलो. ताका लागून तिडकल्ली मिनाक्षी लेखीन म्हणलें, म्हाका दिसता तुमी हांगच्यान वच्चें. जांकां देशाचो गर्व ना, जांकां भारता विशीं उलोवपाक लज दिसता, तांणी युवा संमेलनांत वांटो घेवपाची गरज ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
