भांगरभूंय | प्रतिनिधी
नोंद करिनात तांचें उदक, वीज कनेक्शन तोडटले : पंचायतीचो थाराव
भांगरभूंय । प्रतिनिधी
मडगांव : फाटल्या कांय दिसां सावन विवीध गुन्यांवा खाला सांपडिल्ले दुबावीत हे दवर्ली वाठारांतले आशिल्ल्याचें कळटांच पंचायतीन एक व्हड निर्णय घेतलो. भाडेकारांक कूड भाड्याक दितना पुलीस स्टेशनांत वचून तांची नोंद करची. पुलिशेंन नोंद नाशिल्ल्या भाडेकारांचें उदक आनी वीज कनेक्शन कापतले असो थाराव ग्रामसभेंत घेतिल्ल्याची म्हायती दवर्ली दिकरपालेचे सरपंच हर्क्युलानो निस्साओ हांणी दिली.
ग्रामसभेंत भाडेकारांचे पुलिशेंत जावपी नोंदीचो विशय आयलो. राज्य सरकारान पुलीस खात्याक भाडेकरुंची पडताळणी करपाक सांगलां. सगळ्या पंच वांगड्यांचें सहकार्य घेवन पुलिसांनी दरेका प्रभागांत वचून पळोवणी करची आनी ज्या भाडेकारांची नोंद ना तांची म्हायती घेवची. कसलोय गुन्यांव घडल्यार ही म्हायती उपेगी पडटली. लोकांनी अनवळखी लोकांक भाड्यान कुडी दिवच्यो न्हय. त्यो दिल्ल्यान गांवांतले वातावरण इबाडूं येता. गुन्यांवकार थंय येवन रावूं येता. भाडेकारांची योग्य तरेन चवकशी करून तांची पुलिशेंत नोंद करची. ना जाल्यार पंचायत हे विशीं खर कारवाय करतली, अशी म्हायती सरपंच हर्क्युलानो निस्साओ हांणी दिली. पंचायत वाठारांत 500 परस चड कुडी भाड्यान दिल्यात. दरेका प्रभागांत पुलिसां सयत वचून पळोवणी करतले, अशेंय तांणी म्हणलें.
बेकायदो कसिनो
बेकायदो कसिनोंचो विशय लेगीत म्हत्वाचो. रातच्या वेळार लेगीत गांवांनी जावपी कांय बेकायदेशीर गजाली दाखोवन दिवन उपरांत तांचेर कारवाय केल्या. कांय कडेन ड्रग्स आनी गांजो विकपाक लागिल्ल्याचें दिसून आयलें. केन्ना केन्नाय चुकीच्या मनशांक ताब्यांत घेतात. अशें जावचें न्हय हाची जतनाय पुलिसांनी घेवची. गांवांतल्या तरणाट्यांनी फुटबॉल आनी हेर खेळ खेळचे, पूण अशा चुकीच्या गजालीं कडेन वळचें न्हय असो उलो सरपंच निस्साओ हांणी मारलो.
कावलां अड्ड्यांचेर कारवाय
2012 त सरपंच आसतना गांवांतल्या कावलां अड्ड्यांचेर (स्क्रॅपयार्ड) आपणें कारवाय केल्ली. आतां परत गांवांत ते वाडल्यात. गांवांत ते नाकात, अशी मागणी नागरीक करतात. ते प्रमाण कारवाय जातलीच. कांय जाणांनी न्यायालयांत वचून स्थगिती हाडल्या. सरकारान गांवांगांवांतले कावलां अड्डे हालोवपा खातीर एक जागो उपलब्ध करून दिवचो अशी मागणीय सरपंचान केली. दवर्ली मशिदी कडेन, झरीवाडो चर्ची कडेन झेब्रा क्रॉसींग घालपाची मागणी जाली.
कोमुनिदाद जाग्या विशीं चर्चा
कोमुनिदादीच्यो जमनी बेकायदेशीर रितीन हडप केल्ल्याचो मुद्दो आमदार उल्हास तुयेंकार हांणी विधानसभेंत मांडलो तेन्ना एसआयटी नेमपाचें आस्वासन मंत्र्यान दिलां. पंचायतीन ह्या निर्णयाक येवकार दिलो आनी पंचायती कडल्यान ते खातीर जें सहकार्य गरजेचें आसा तें दिवपाचो थाराव घेतला. ही एसआयटी बेगीन नेमून जमनींची चवकशी करची, अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
