भांगरभूंय | प्रतिनिधी
म्हापशें पालिकेंत मारली बसकण; उपसभापतींचें उपाय काडपाचें आस्वासन
म्हापशें: बाजारपेठेंतल्या दुकानांचें भाडें वाडयिल्ल्याच्या विरोधांत म्हापशेंचे वेपारी आक्रमक जाल्यात. बिरेस्तारा सकाळीं वेपारी वर्गान वेपारी संघटणेच्या फुडारपणा खाला आपली दुकानां बंद दवरून पालिकेचेर धडक मोर्चा व्हेलो. पालिकेंत अडेज वरां बसकण मांडले उपरांत थळाव्या आमदारान ह्या प्रकरणांत लक्ष घालून उपाय काडपाचें आस्वासन दिलें. उपरांत आंदोलक वेपारी वर्ग परतून गेलो.
पालिका मंडळान येता त्यां कांय दिसांनी खर पावलां उबारलीं नात जाल्यार मार्केटा सयत शार बंदच्या पर्यायाचेर वेपारी ठाम आशिल्ल्याचें तांणी ह्या वेळार उलोवन दाखयलें.
बिरेस्तारा सकाळीं 9.30 वरांच्या सुमाराक वेपारी वर्ग मार्केटांत शकुंतलेच्या पुतळ्या कुशीक जमले. हातूंतल्या चडश्या वेपाऱ्यांनी आपलीं दुकानां स्वइत्सेन बंद दवरिल्लीं. उपरांत सगल्या वेपाऱ्यांनी आपलो मोर्चा म्हापशें पालिके कडेन वळयलो. हातूंत 200 परस चड वेपारी वांटेकार जाल्ले.
नगरपालिकेंत नगराध्यक्षा, उपनगराध्यक्ष आनी मुख्याधिकारी नाशिल्ले. दर बिरेस्तारा आमदार पालिकेंत येवन लोकांची गाराणीं आयकतात. पूण तेवूय पालिकेंत गैरहाजीर दिसले. ताका लागून वेपाऱ्यांनी पालिकेच्या प्रवेशदाराचेरूच बरोच वेळ संबंदिताची वाट पळयली. उपरांत तांणी पालिका कचेरेच्या सोंपणांचेर बसकण मांडली. भाडें वाड फाटीं घेवपा विशींच्यो घोशणा दिल्यो.
दोन वरां उपरांत आमदार तशेंच उपसभापती ज्योशुआ डिसोझा, नगराध्यक्षा प्रिया मिशाळ, उपनगराध्यक्ष विराज फडके आनी हेर कांय नगरसेवक पालिकेंत दाखल जाले. ह्या वेळार उपसभापतींनी वेपारी संघटणेच्या पदाधिकाऱ्यां बरोबर बंद दारा आड बसका घेतली आनी वेपाऱ्यांचे मागणेचेर चर्चा केली. बसके उपरांत उपसभापती डिसोझा वेपारी संघटणेच्या पदाधिकाऱ्यां सयत भायर आयले. तांणी आपणे ह्या प्रकरणांत लक्ष घालून उपाय काडटा अशें आस्वासन दिलें उपरांत वेपारी परतून गेले.
हे विशीं म्हापशें वेपारी संघटणेचे सचीव सिद्धेश राऊत हांणी म्हणलें, भाडेंवाड विरोधांत आतां सगल्यांनी संघटीत जावपाची गरज आसा. पालिकेन वेपाऱ्यांक विस्वासांत घेनासतना सरसकट दुपेटीन भाडें वाड केल्या. पालिका बाजारपेठेंत मुलभूत सुविधा पावयना. फक्त कोयर उबारता. पालिकेच्या ह्या गैरवेवस्थापणाचो फटको दर फावटी वेपाऱ्यांक बसता. पालिकेन घरपट्टी आनी भाडेंपट्टी वाडयल्या. हो दर आमकां मान्य ना.
वेपारी संघटणेचे वांगडी आशिश शिरोडकारान म्हणलें, पालिकेन सरसकट 100 टक्के भाडें वाड केल्या. ही पद्दत कायद्यांत बसना. पालिका मंडळ हें असंवेदनशील आसा. वेपार्यांचे हीत तांकां कळना. हाचे पयलींच आमी आमच्या कागाळीचें निवेदन पालिका संचालकांक दिलां.
मार्केटांत खूबशीं रितीं दुकानां आसात. तांची पावणी करून ती भाड्यान दिल्यार पालिकेक महसूल मेळूंक शकता. पूण पालिकेन तशें केल्लें ना. तांकां फक्त वेपाऱ्यांकूच लक्ष्य करपाचें आसता असो आरोप तांणी केलो.
हालींच म्हापशें पालिका मंडळाचे बसकेंत पालिकेच्या स्थावर मालमत्ता आशिल्ल्या बाजारपेठेंतल्या दुकानांच्या भाड्यांत भौशीक बांदकाम खात्याच्या दरा प्रमाण वाड करपाचो थाराव घेतिल्लो. ते प्रमाण नवो दर 152 रुपया वेल्यान 296 रुपया प्रती चौखण मिटर केलो. ह्या दुपेट दरवाडीक वेपाऱ्यांचो खर आक्षेप आसा.
वेपारी संघटणेन म्हाका निवेदन दिल्लें. हाचेर अजून पालिका मंडळा सयत चर्चा जावपाची आसा. वेपाऱ्यांचे मागणे प्रमाण आमी आयजूच पालिका मंडळाच्या सत्ताधारी गटा सयत चर्चा करून ताचेर योग्य तो उपाय काडूं. हो निर्णय उपरांत आमी सगल्यांक कळोवं अशें आस्वासन उपसभापती ज्योशुआ डिसोझा हांणी वेपाऱ्यांक दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
