भांगरभूंय | प्रतिनिधी
भांगरभूंय । प्रतिनिधी
मडगांव : माजोड्ड्यां रावपी चंद्रा योलगाकर हे जाण्टे बायलेक भांगराच्यो वस्तू पॉलीश करून दिता अशें सांगून भांगर चोरपी दोगां चोरांक लोकांनी धरून बरेच बडयले. उपरांत कोलवा पुलिसांक आपोवन त्या दोगांगूय तांच्या ताब्यांत दिले. सध्या त्या दोगूय चोरांचेर हॉस्पिटलांत उपचार चलता.
ही घडणूक शेनवारा दनपरां घडली. चंद्रा योलगाकर हे 60 पिरायेचे बायलेक कोलवा पुलीस स्टेशनांत हे विशीं कागाळ नोंद केली. दुबावी सोनू कुमार आनी चंद्रशेखर साह ह्या दोगांय आड पुलिसांनी गुन्यांव नोंद केला.
हे दोगूय मूळ बिहारचे. सोनू कुमार आनी चंद्रशेखर साह हे बायलां कडल्यान भांगराच्यो वस्ती पॉलीश करपाचें सांगून रसायन घालून भांगर चोरताले. शेनवारा तांणी योलगाकर हिका भांगर पॉलीश करून चकचकीत करून दितां अशें सांगलें. योलगाकर हांणी गळ्यांतली सरपळी पॉलीश करपाक दिली. दोगूय दुबावितांनी भांगराचे सरपळेचेर सायन ओतलें. तें घालताच भांगर विर्गळ्ळें. उपरांत दुबावितांनी मोडिल्ली सरपळी ज्येश्ठ बायलेक परत दिली. तुटिल्ली सरपळी पळोवन हो चोरयेचो प्रकार हें तिका समजलें. तिणें आशि-कुशीकच्या लोकांक आपोवन चोरयेचो प्रकार सांगलो.
तिडकल्ल्या लोकांनी दोगांय दुबावितांक कांय प्रस्न विचारले. तांच्यो जापो सारक्यो मेळूंक नाशिल्ल्यान लोकांनी त्या दोगांकूय बरेच बडयले. उपरांत तांकां पुलिसांच्या ताब्यांत दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
