बेकार तरणाट्यांचो विचार सरकार केन्ना करतलें ?

भांगरभूंय | प्रतिनिधी

भारत देश हो संवसारातलो तरणाटो देश म्हूण आमी मिरयतात खरे, पूण होच तरणाटो जर दिशाहीन जालो आनी ताका ह्या देशांत कांयच फुडार ना अशें दिसूंक लागलें जाल्यार ….

दिश्टीकोन

किशोर नायक गांवकार

बाबा, पळय रे पुता, म्हज्या चल्याचें कामाचें खंयूय  जाता जाल्यार. तो सामको निर्शेला. सगळीं सर्टिफिकेटां घेता आनी जीवूच दिता म्हण्टा. खंयचें म्हूण हाडटलें रें हांव लाख. पळय मरे मात्सो सीएमा कडेन उलोवन खंयूय कामाचें जाता जाल्यार… लग्न सुवाळ्याक मेळिल्ले एके वळखीचे बायलेन दोळ्यांनी दुकां काडून केल्ले हे विनवणी उपरांत मन खुबूच दुख्खी जालें. ही बायल मनीस पयसुल्ली सोयरी. दोनूय भुरगीं ल्हान आसतना बापुय गेलो. आवयन कपडे शिवून आनी सोयऱ्या- धायऱ्यां कडेन मजत घेवन भुरग्यांक खूब शिकयलीं. आतां शिकून जालें, पूण नोकरी खंयच मेळना. गांवांत धावे पासून पंदरावी मेरेन तिचो पुत पयलो आयलो. पूण नोकरे खातीर दिल्ले परिक्षेंत मात हरशीं निमणें आयल्ले ताचे इश्ट पास जाले आनी तांकां नोकरीय मेळ्ळी. हो मात उरलो. सीएमाक सांगून कितें कमी पयश्या भितर काम जाता जाल्या पळय अशें म्हूण ती प्रार्थना करताली. आपलो पूत शिकपाक बरो आसा आनी ताणें पयलो नंबर केन्नाच सोडूंक ना म्हूण फुकट काम जावचें अशेंय तिचे बाबडेचें मत नासलें. पूण, पयशां बगर सरकारी नोकरी मेळूंक शकना हें आतां लोकांच्या मनांत घट्ट बसलां. 

एकूच आशा…

एक तर तुमी सारकेच आमदार, मंत्र्यांच्या कुशीकचे आनी खाशेले आसचे पडटात. ना जाल्यार तुमचे कडेन दिवपाक पयशे तरी आसचे पडटात. पयशे आशिल्ले लोक केन्नाच आमदार, मंत्र्यां भोंवती घोळको घालतना दिसनात. कित्याक तर ते हक्कान नोकऱ्यो विकत घेतात, पूण सामान्य मनीस जाचे कडेन नोकऱ्यां खातीर दिवपाक पयशे नासतात ते मात तांच्या आवय, बापाय सयत आमदार, मंत्री सांगतात थंय वचत आसतात. तांच्या, पक्षाच्या कार्यावळींक चुकनासतना हाजीर रावतात. एकूच आशा आसता आपल्या पुताचें ना जाल्यार धुवेंचें काम करतलो म्हूण. हातूंतल्यान काय जाणांक नोकरीय फावो जाल्या, पूण सगल्यांकूच न्याय मेळटाच असो ना. काय जाणांचे नशिबूच फुटकें म्हणपाचें. कितल्योय राटावळी केल्यो तरीय पूण येस मेळनां,अशीय प्रकरणां पळोवंक मेळटात.

तत्वां खुटयाळ्याक

आयचे घडयेक सरकारी नोकरी होच खरो मुखेल प्रश्न गोंयकारां मुखार आसा. मागीर ती फावो करपाक लागून कितेंय करपाची लोकांची तयारी आसा. कोणाचेरूय विस्वास दवरून लाखांनी रूपयांक फटवल्ले लोकूय पळोवंक मेळटात. हालींच्या तेंपार नोकरी मेळोवन दिवपाक लागून लाखांनी रूपयांचे वेव्हार जाल्लीं प्रकरणां उक्ताडार आयल्यांत. लजेक लागून लोकांनी कागाळ करूंक नाशिल्ल्यान आनीक कांय उजवाडाक येवंक ना आसतलीं. जण एकलो आवय- बापूय आपल्या भुरग्यांच्या फु़डाराची चिंता करता जाल्यार जण एकलो तरणाटो आपलो फुडार घडोवपाक धडपडत आसता. सरकारी नोकरेच्या नांवान सद्याक जो कितें धंदो आनी प्रकार चल्ला तें पळयत जाल्यार कायदो, नेम, तत्वां, न्याय हे सगले शब्द खुटयाळ्याक लायल्यात हें आनीक बरे तरेन स्पश्ट जाता. लोकांचो कायद्या वयलो विस्वास उणो जावपाक लागला. आमदार, मंत्री कितेंय करपाक शकतात हो विस्वास दृढ जाला आनी आतां लोक असल्योच गजाली घेवन आमदार, मंत्र्यां फुडें वचपाक लागल्यात. जो आमदार, मंत्री बेकायदा गजालींक पालव दिता तो येसस्वी आनी जो आमदार, मंत्री लोकांक कायदो, नेम, तत्वांच्यो गजाली सांगतात तो फुडले वेंचणुकेंत घरा वता, हेंवूंय आमकां पळोवंक मेळटा. मंत्री जाले उपरांत तांच्याच मतदारसंघांतल्या उमेदवारांक नोकऱ्यो कश्यो मेळटात हाचो जाब कोणूच विचारीना आनी अशो कितल्योशोच गजाली उक्ताडार येवूनूय बी खंयचेंच न्यायालय ताची स्वेच्छा दखल घेना, हेंवूंय लोक जाणात. तरीय पूण लोकशायचो तिसरो खांबो म्हटल्यार न्यायव्यवस्था. तिणें कितलेशेच फावटी आपल्या वयलो विस्वास कायम दवरला. 

वीज खात्यान अशेच तरेन बेकायदा पद्धतीन जाल्ली सहाय्यक डेटा एन्ट्री ऑपरेटराची पदां पाच वर्सा उपरांत न्यायालयान बेकायदा थारोवन रद्द केल्लीं आनी पात्रतेयेच्या निकषाचेर नव्या उमेदवारांची भरती करची असो आदेश दिल्लोय आमी पळयला. हांतूत कितल्याश्याच सरकारी कर्मचाऱ्यांक पाच वर्सां नोकरी करूनूय बी घरा वच्चें पडलें. पूण हाका जबाबदार मंत्री वा अधिकाऱ्यांक कसलीच ख्यास्त जावंक ना. निमणो उपाय म्हणटा तो न्यायालयाचीं दारां धाडोवपाचीं, पूण सगल्यांकूच न्यायालयांत वचपाक परवडटा कांय कितें हेवूंय तितलेंच म्हत्वाचें. 

तरणाटे वैफल्यग्रस्त

नोकरीच्या विशया वयल्यान आयची गोंयची तरणाटी पिळगी पुरायपणान वैफल्यग्रस्त जाल्या. गुणवत्ता आनी हुशारी ही फकत कार्यावळींनी पुरस्कार आनी सन्मान फावो करपाच्याच लायकेची उरल्या. खाजगी मळार कांय कडेन मात गुणवत्तेक आनी हुशारेक म्हत्व आसा, पूण सरकारी पातळेर गुणवत्ता आनी हुशारेची जे तरेन फकांडां चल्ल्यांत तें पळयत जाल्यार जीव कासावीस जाता. सरकारी खात्यां कडल्यान जावपी नोकरभरती पुरायपणान फार्स थारल्या, हें वेगळें सांगपाची गरज ना. गोंय लोकसेवा आयोगा कडल्यान जावपी नोकरभरती मात हाका आडवाद. आयोगा कडल्यान पारदर्शकता, गुणवत्तेक म्हत्व आसा हें कितल्याश्याच प्रकरणांतल्यान दिसून आयलां. ही एक बरी गजाल, पूण हालींच गोंय लोकसेवा आयोगाचे अध्यक्ष जुझे नोरोन्हा हांणी स्वेच्छा निवृत्ती घेतली कित्याक, हो लेगीत चर्चेचो विशय जाला. गोंय शारी विकास संचालक गुरूदास पिळर्णकार हांणीय दिल्ल्या व्हीआरएसा वयल्यान बोवाळ पडला. प्रशासनांत कायद्यान काम करपाची इत्सा बाळगुपी अधिकाऱ्यांक नोकरी सोडची पडटा कांय कितें,असो संशय येवपाक लागला. आमदार, मंत्र्यांचो दबाव इतलो वाडपाक लागला की नोकरी सोडची ना जाल्यार तांच्या तालार नाचपाचें अशे दोनूय पर्याय तांचे फुडें उरल्यात. कांय अधिकारी आजूनूय बी आपली विस्वासाहर्ता जपून आसात, पूण परतुन परतून बदली जावपी अधिकाऱ्यां मदीं तांचो आसपाव जाता हें कित्याक हाचोय वेगळो सोद लावचो पडटलो. सरकारी अधिकाऱ्यांनी आमदार, मंत्र्यांक भीक घालप ना वा तांचे आयकप ना अशें म्हणप खूप सोपें, पूण तांचीय स्वताची जीण आसता आनी तांकाय खूबशे प्रस्न आसतात. अशा वेळार मागीर आमदार, मंत्र्यांच्या उतराचे गुलाम म्हूण वावरप तांकां भाग पड्टा. कायद्यान वागलो आनी कारवाय जाल्ल्या कितल्या अधिकाऱ्यां फाटल्यान लोक रावले, होय प्रस्न आसाच. दर एकलो आपलो फायदो पळयता आनी वारें येता तशें सूप धरता म्हणटूकूच सगली प्रशासकी वेवस्थाच दिशाहीन जायत चल्ल्या. 

आयोगाक थोड्यांचो विरोध

गोंय कर्मचारी भरती आयोगाचो क्रांतीकारी निर्णय मुख्यमंत्री डॉ. प्रमोद सावंत हांणी घेतलो. जनतेन उक्तेपणान तांच्या ह्या निर्णयाक येवकार दिलो, पूण आजूनूय आयोगा मार्फत एकूय नोकरभरती जावंक ना. आतां लोकसभा वेंचणुकेचेर नदर दवरून आयोगा वतीन कांय जायराती प्रसिद्ध जाल्यात, पूण वेंचणुके पयलीं ही भरती जावंक शकना हेवूय तितलेंच खरें. आयोगाच्या नोकर भरतेच्या अधिकाऱ्यांक आतां मेरेन तीन फावटी मुजतवाड दिल्या. सरकारांतल्याच कांय आमदार, मंत्र्यांचो ह्या आयोगाक खर विरोध आसा. एक म्हत्वाकांक्षी मंत्री तर आपल्या लोकांक सांगता की आपूण मुख्यमंत्री जाल्या उपरांत पयलो निर्णय कितें घेतलो जाल्यार तर हो आयोग रद्द करपाचो. कांय- कांय वेळार नोकरी होच विशय कांय बऱ्या आमदारांच्या पराभवाक कारण थारला. नोकरी एकल्याक मेळटा, पूण नाराजी खूपश्या उमेदावारांची जाता. अशा उमेदवारांक हुमकळून दवरपाक लागून आतां आयोगाच्या नोकऱ्यांचें गाजर फुडें करप सुरू आसा कांय कितें, अशेंय लोक उलोवपाक लागल्यात. खाजगी मळार नोकऱ्यांच्या नांवान बेरोजगार तरणाट्यांची फटवणूक चल्ल्या. फावो तसो आनी शिक्षणाच्या तुळेंत पगार मेळना. हे नोकरेक आनी पगाराक बँकोय रीण दिनात म्हणटूकूच सरकारी नोकरी होच पर्याय उरता आनी ताका लागून पुराय तरणाटी पिळगी आयज नोकरेक लागून ह्या राजकी नेत्यांची उक्तेपणी गुलामी करतनाचें दुर्दैवी चित्र दिसता.

देशां फुडलें संकश्ट?

सरकारी नोकरदारांचो आंकडो आतांच सुमार 65 हजारांचेर पावला. दर म्हयन्याक सुमार साडेतीनशें कोटी रूपया पगाराचेर खर्च जाता. सरकारी येणावळीच्या तुळेंत हो पगार दिवप सरकाराक परवडना. हाचे भायर कंत्राटी पद्दतीचेर पाच ते पंदरा वर्सां मेरेन काम करपी सुमार पाचेक हजार कर्मचारी आसात. केन्ना ना केन्ना तरी आपली नोकरी कायम जातली हे आशेर ते जगतात. मागीर कायम नोकरेच्या वेळार तांकां घरा धाडून नव्या उमेदवारांची नेमणूक जाता आनी हे लोक धड्यार पडटात. राजकारण्यांक कांयच फरक पडना. कित्याक तर तांचो संबंद फकत मतां कडेन आसता. भाजपाच्या सरकारच्या वेळार रोजगारपूर्व प्रशिक्षणार्थी म्हूण घेतिल्ले. तांका काँग्रेस सरकारान पिळून काडले. आतां काँग्रेसीच्या तेपार कंत्राटी पद्दतीचेर घेतिल्ल्या कंत्राटी कामगारांची भाजपा कडल्यान पिळवणूक सुरू आसा. दोनूय पक्ष एकामेकांचे आमदार चोरतात तेन्ना तांका कांयच फरक पडना, पूण ह्या तरणाट्यांक कायम नोकरी दिवच्या वेळार मात ते एकामेकां कडेन बोट दाखोवंक लागतात. भारत देश हो संवसारातलो तरणाटो देश म्हूण आमी मिरयतात खरे, पूण होच तरणाटो जर दिशाहीन जालो आनी ताका ह्या देशांत कांयच फुडार ना अशें दिसूंक लागलें जाल्यार तोच ह्या देशा फुडलें सगल्यांत व्हडलें संकश्ट जावं येता, हाची जाणीव आमकां दवरची पडटली. तशें जावचें न्हय, हेंय पळोवचें पडटलें. आमचे फुडारी हाची दखल घेत कांय?