भांगरभूंय | प्रतिनिधी
34 जाणांक अटक, 50 लाखांचें सामान जप्त
म्हापशें ः बार्देसांतल्या दयारदेग वाठारांतल्या कळंगूट आनी हणजुणां थाटिल्ल्या आनी अमेरिकन नागरिकांची फटवणूक करपी बेकायदो कॉल सेंटरां थळाव्या पुलिसांनी उध्वस्त केल्यांत. ह्या प्रकरणांत वट्ट ३४ दुबावीतांक अटक करून सुमार ५० लाखांचो माल जप्त केला.
म्हायती आनी तंत्रज्ञान कायदो तशेंच भारतीय न्याय संहितेच्या आदारार दुबावीत आरोपीं आड फटवणुकेचो गुन्यांव दाखल केला.
मंगळारा फांतोडेर पुलिसांनी ही कारवाय केली. खोब्रावाडो, कळंगुटेच्या एका रिसॉर्टांत बेकायदो कॉल सेंटर सुरू आशिल्ल्याची म्हायती कळंगूटे पुलिसांक मेळिल्ली. पुलीस निरीक्षक लक्षी आमोणकार हांच्या नेतृत्वा खाला पुलिसांनी ह्या रिसॉर्टाचेर छापो घालो.
ह्या वेळार थंय कॉल सेंटराचो वेव्हार सुरू आशिल्लो. ह्या कॉल सेंटरांत आशिल्ल्या वट्ट १९ जाणांक ताब्यांत घेतले आनी उपरांत दुबावितांक अटक केली. तशेंच मोबायल, लॅपटॉप आनी हेर वस्तू मेळून सुमार २५ लाखांचें सामान जप्त केलें.
दुसरी कारवाय चिवार हांगा हणजूण पुलिसांनी केली. पुलीस निरीक्षक कृष्णा सिनारी हांच्या नेतृत्वा खाला पुलिसांनी एका रिसॉर्टाचेर छापो घालो आनी ह्या अवैध्य तरेन चलोवपी कॉल सेंटराक उक्तडार हाडलें.
पुलिसांनी हे छापेमारींत वट्ट१५ जाणांक अटक केली आनी मोबायल, लॅपटॉप आनी हेर गजाली मेळून सुमार २५ लाखांचें सामान जप्त केलें.
दुबावीत आरोपी ह्या कॉल सेंटराच्या माध्यमांतल्यान अमेरिकन नागरिकां कडेन संपर्क सादलो. रीण आनी रोखडीच रोख रक्कम दिवपाचें तांकां हांयस दाखोवन आरोपी अमेरिकन नागरिकांक गिफ्ट कार्ड्सां वरवीं तोपी घालताले. विदेश नागरिकां कडल्यान आयिल्ल्या कागाळींच्या आदारार कळंगूटे आनी हणजूण पुलिसांनी ही कामगिरी केली.
मजगतीं, दोन म्हयन्यां आनीं २७ मार्चाक सायबर गुन्यांव फांट्यान म्हापश्यां चलपी अशेच तरेच्या फेक कॉल सेंटराक उक्तडार हाडिल्लें. घाटेश्वरनगर खोर्लीच्या एका बंगल्यार छापो घालून ७ जाणांक अटक केल्ली आनी २१ लाखांचे सामान जप्त केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
