भांगरभूंय | प्रतिनिधी
पणजी: म्हादय रानजीव अभयारण्यांतलो प्रतिबंधीत वाठार आशिल्ल्या ’बाराजण घसघश्याचेर’ परवान्या बगर प्रवेश केल्ल्या प्रकरणांत गोंय रान खात्यान पांच जाणां आड कारवाय केल्या. ह्या स जाणांच्या गटांतल्या ओडिशा हांगच्या आदित्य दीपक कुमार सत्पती ह्या २० वर्सां पिरायेच्या पर्यटकाक बुडून मरण आयले उपरांत खात्यान ही कारवाय केली.
आयतारा बेळगांवच्या स जाण तरणाट्यांचो गट ‘बाराजणांच्या घसघश्याचेर’ भोंवपाक आयिल्लो. तातूंतलो आदित्य दीपक कुमार सत्पती हो तरणाटो बुडिल्लो. उपरांत रान खात्यान वांगडा आशिल्ल्या पांच जाणां आड कारवाय करपाक सुरवात केल्या.
घोग्यानी पावस, वाडिल्लो उदकाचो प्रवाह आनी धोको निर्माण करपी परिस्थिती लक्षांत घेवन ’बाराजण घसघसो’ वाठारांत पर्यटकांच्या प्रवेशाचेर बंद घाल्या. मात, संबंदीत गटान परवानगी घेनासतना बंदी घातिल्ल्या वाठारांत प्रवेश केल्ल्याचें तपासांत समजलें.
सुचवण्यो खरपणान पाळच्यो: रान खातें
मजगतीं, पर्यटकांनी पावसांत धोको निर्माण करपी आनी बंदी घातिल्ल्या पर्यटनस्थळांक भेट दिवप टाळचें, तशें रान विभागाच्यो सुचवण्यो खरपणान पाळच्यो, असो उलो खात्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
