भांगरभूंय | प्रतिनिधी
पणजीः संवसारांत सगळ्यांत चड थोरियमचे सांठे भारता कडेन आसात. एकदां आमी थोरियम पसून ऊर्जा तयार करपाचें तंत्रज्ञान हाताळ्ळ्यार आमी आमच्या फुडाराच्यो सगळ्यो ऊर्जेच्यो गरजो पुराय जावपाक शकतात आनी भारत संवसारातल्या ओपेक देशा मदलो एक देश जावंक शकता. संवसारांतल्या हेर खंयच्याच देशां कडेन हें तंत्रगिन्यान सद्याक तरी ना. देखून हें तंत्रगिन्यान पयलीं तयार करून भारताक संवसाराचो फाटलाव करचे सुवातेर फुडारपण करपाची एक व्हड संद आसा, अशें नामानेचे वैज्ञानीक डॉ. अनिल काकोडकार हांणी सांगलें.
गोंय विद्यापिठान आपलो ४२वो स्थापना दीस मनयलो. ह्या वेळार भारतीय अणू उर्जा आयोगाचे वांगडी, राजीव गांधी विज्ञान आनी तंत्रगीन्यान आयोगाचे अध्यक्ष आनी होमी भाभा नॅशनल इन्स्टीट्यूटचे कुलगुरू अनिल काकोडकार हे सुवाळ्याक मुखेल सोयरे म्हण हाजीर आशिल्ले. उच्च शिक्षण आनी राष्ट्र उदरगत हे विशयाचेर तांचो परिसंवाद जालो. ह्या वेळार गोंय विद्यापीठाचे कुलगुरू हरिलाल मेनन आनी निबंधक सुंदर धुरी हाजीर आशिल्ले.
भारताक जर बळीश्ट देश म्हण सुवात मेळोवपाची आसत जाल्यार स्वदेशी तंत्रगिन्यानाच्या आदाराचेर संवसारांत पयलेच खेपे आनी व्हड प्रभाव घालपी नवो सोद लावचो पडटलो, अशें काकोडकर हांणी सांगलें.
भारताच्या अणुऊर्जेच्या प्रवासाचेर उलोवप करतना डॉ. काकोडकर हांणी सांगलें, आंतरराष्ट्रीय निर्बंध आसून लेगीत भारतान आपल्याच बळग्यार ’प्रेशरायज्ड हॅवी वॉटर रिएक्टर’ (PHWR) तंत्रज्ञानाचेर मेळयल्ल्या जैताचेर आमकां अभिमान आसा. भारतान फकत प्रगत तंत्रगिन्यानच मेळोवंक ना, तर संवसार भारताक एक ’जापसालदार देश’ म्हूण वळखता आनी हें तंत्रगिन्यान मनशाच्या सुसंस्कृत आनी प्रगल्भ वर्तणुकेक लागून साध्य जालां.
खंयच्याय देशाक मेळपी प्रतिश्ठा आनी ताचें बळगें फक्त पयशांचे गिरेस्तकायेचेर थारना, तर तें ताच्या सेगीत चालू आशिल्ल्या तंत्रगिन्यानाच्या व्हडपणाचेर थारता. रशिया परस संवसार अमेरिकेक चड मान दिता कारण अमेरिकेची अथीर्र्क सत्ता प्रगत तंत्रगिन्यानाचेर उबी आसा, अशें काकोडकार हांणी म्हणलें.
लश्करी आनी अर्थीक बळग्या खातीर तंत्रज्ञानाची तांक म्हत्वाची आसा. देशाक तंत्रगिन्यानाचो सोद सेगीत आनी सासणा खातीर लावचो पडटलो. हो भू-राजकीय आनी विकासात्मक बदल घडोवन हाडपा खातीर भारताच्या उच्च शिक्षण आनी संशोधन क्षेत्राक संवसारांत पयल्या नंबराचेर हाडप, होच एकूच मार्ग आसा, अशें मत काकोडकार हांणी मांडले.
फुडले दिकेन पावल मारपाक मजत करपी दोन खाशेले आनी सगळ्यांत म्हत्वाचें मळ म्हळ्यार शिक्षण आनी भलायकी. शिक्षणाच्या बाबतींत पळोवपाक गेल्यार, गोंय हें चड नशीबवान अशें म्हाका दिसता. शिक्षणाचे सगळेच आयाम खूब म्हत्वाचे आसतात, पूण उच्च शिक्षण संस्थां बाबतींत गोंयांत अशा संस्थांची संख्या कदाचीत खूब चड आसा. हांगा गोंय विद्यापीठ, आयआयटी, एनआयटी, बिट्स आनी तेच प्रमाण आयुर्वेद, वैजकी, आभियांत्रीक, मॅनेजमेंट आनी हेर जायत्या क्षेत्रांतल्यो संस्था आसात, अशें पद्म विभूषण डॉ. अनिल काकोडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
