भांगरभूंय | प्रतिनिधी
सांवड्डें: फक्त आठ विधानसभा वेंचणुकांचो अणभव आशिल्ल्या सांवड्डें मतदारसंघाची रचणूक 1989 वर्सा जाली. ताचे पयलीं ह्या वाठाराचो आस्पाव सांगें मतदारसंघांत आशिल्लो. 2010 उपरांत अस्तित्वांत आयिल्ल्या धारबांदोडें म्हालांतल्यो पांच पंचायती आनी सांगें म्हालांतल्यो दोन पंचायती मेळून सांवड्डें मतदारसंघ जालो. सद्याचे आमदार तशेंच सभापती डॉ. गणेश गांवकार आनी समाज कार्यकर्ते तशेंच मुख्यमंत्र्यांचे स्वीय सहाय्यक संकेत आर्सेकार हे उमेदवारी खातीर इत्सूक आसात. आदले आमदार तशेंच आदले राज्यसभा खासदार विनय तेंडुलकार, विनायक गांवस, हेवूय भाजपाच्या उमेदवारी खातीर इत्सूक आसात.
सांगें मतदारसंघ हो काँग्रेसीचो मतदारसंघ म्हूण मानताले. अशें आसून लेगीत सांवड्डें मतदारसंघांत अस्तित्वांत येत सावन आतां मेरेन ह्या मतदारसघांत काँग्रेसीक बुन्याद घालूंक आयली ना. हो मतदारसंघ भाजप आनी मगोचो मतदारसंघ म्हूण मानतात. 1989 च्या पयल्या विधानसभा वेंचणुकेंत मगो पक्षाचे मोहन आमशेकार जैतिवंत जाल्ले. 1994चे वेंचणुकेंत मगो पक्षाचे विष्णू प्रभू हांणी जैत मेळयिल्लें. 1999 आनी 2002 चे विधानसभा वेंचणुकेंत भाजपाचे विनय तेंडुलकार जैतिवंत जाल्ले. 2007 चे वेंचणुकेंत अपक्ष उमेदवार आनी उद्देगपती अनील साळगांवकार हांणी जैत मेळयिल्लें. 2012 चे वेंचणुकेंत बळिश्ट उमेदवार अर्जून साळगांवकार हांकां हारोवन भाजपाचे गणेश गांवकार जैतिवंत जाले. 2017 चे विधानसभा वेंचणुकेंत मगो पक्षाचे दीपक पावसकार हांणी भाजपाचे उमेदवार गणेश गांवकार हांकां 5,221 मतांच्या फरकान हारयिल्लो. पूण 2022 चे विधानसभा वेंचणुकेंत भाजपाचे गणेश गांवकार हांणी पुनरागमन करून अपक्ष उमेदवार दीपक पावसकार 5,190 मतांनी हारयिल्लो.
सद्या आमदार डॉ. गडेश गांवकार हे सभापती आसात. ह्या मतदारसंघांतले गणेश गांवकार आनी विनय तेंडुलकार हे चड काळ राजकारणांत तिगल्यात. ह्या मतदारसंघांत भाजपा आनी मगो सोडल्यार हेर पक्षांचे प्राबल्य ना ही वस्तुस्थिती आसा. पूण 2027चे वेंचणुकेंत भाजप आड भाजप अशें चित्र सद्याचे घडयेक दिसून येता.
भाजपाचे तिकेटी खातीर सभापती डॉ. गणेश गांवकार, विनय तेंडुलकार, विनायक गांवस आनी संकेत आर्सेकार हे इत्सूक आसात. हातूंत फाटले वेंचणुकेंत मगो पक्षा वतीन वेंचणूक लडयिल्ले विनायक गांवस हांणी हालींच भाजपांत प्रवेश केला. पूण तरी लेगीत खंयचेय परिस्थितींत आपूण वेंचणूक लडयतलोंच अशे ते उलोवन दाखयतात. फाटल्या 40 वर्सां सावन धारबांदोडें पंचायत तांच्या हातांत आसा. सद्या मतदारांच्या संपर्कांत ते आसात. ताका लागून भाजपाची तिकेट मेळ्ळी ना जाल्यार ते भाजपांत रावनासतना हेर पक्षाची वाट धरतात काय अपक्ष म्हूण वेंचणूक लडयतात हें पळोवपाक मात्शी वाट पळोवची पडटली.
विनय तेंडुलकार थारतले ‘किंग मेकर’
विनय तेंडुलकार हे पक्षाचे निश्ठावंत कार्यकर्ते आसात. पक्षांत रावन तांणी खूबशीं म्हत्वाचीं पदां भुशयल्यांत. आपूण अंदूं वेंचणूक लडयतलों अशें ते सांगतात. तांणी ते नदरेन कामूय सुरू केलां. पूण गणेश गांवकार हांकां तिकेट मेळ्ळ्यार आपूण तांकां तेंको दिवं अशेंय उक्तेपणान जाहीर करून तांणी खूबशे संकेत दिल्यात. एक मात खरें विनय तेंडुलकाराच्या तेंक्या बगर सांवड्डें मतदारसंघांतलो खंयचोच उमेदवार जैतिवंत जावंक शकना. दखल घेवपा सारकी गजाल म्हणल्यार तांणी आपलो पूत विनील तेंडुलकार हाका आतां सावनूच मतदारसंघांत सक्रीय करून आपली फुडली रणनिती स्पश्ट केल्या.
संकेत आर्सेकार हांणी मतदारसंघांत आपलें काम नेटान सुरू केलां. राजकी फाटभूंय आशिल्ले आनी खूबश्या वर्सां सावन सांवड्डेंच्या राजकारणांत सक्रीय आनी धोंपराक बाशींग बांदून बशिल्ले राजकारणी तांकां मना सावन सांगात दितले काय कितें हाचेर संकेत आर्सेकार हांचो राजकी फुडार निंबून आसा. संविधानीक उच्च पदार आशिल्ले सभापती डॉ. गणेश गांवकार आनी भाजपाचे कोर कमिटीचे वांगडी विनय तेंडुलकार हांचे सारके दिग्गज आसतना संकेत आर्सेकार हांणी मतदारसंघांत केल्ल्या प्रवेशान मतदारसंघांतल्या खूबशा जाणांक भियेवन सोडल्यात, हेंवूय तितलेंच खरें आसा.
मतदारांची नाडी वळखल्लो फुडारी: गणेश गांवकार
डॉ. गणेश गांवकार हे सांवड्डें मतदारसंघाच्या विकासाचे खरे शिल्पकार आसात, अशें खूबश्या राजकी जाणकारांचें मत आसा. सामके धूर्त आनी अभ्यासू राजकारणी अशी तांची वळख आसा. विकासाचे बाबतींत कोणूच तांचो हात धरूंक शकनात, ही तांची जमेची बाजू आसा. जिल्हो पंचायत वेंचणुकेंत दाेनूय उमेदवारांक वेंचून हाडून तांणी आपलें वर्चस्व सिद्ध केलां.
सांकड्डें पंचायतीचे पोटवेंचणुकेंत आपणें पुरस्कृत केल्लो उमेदवार व्हड मताधिक्यान वेंचून हाडपाक ते येसस्वी थारले. फोंड्यां रावन लेगीत ते चडांत चड वेळ मतदारसंघांत उपलब्ध आसतात. सेगीत मतदारसंघांची भोंवडी करीत आसतात. मदेकांत भलायकेची कागाळ आसून लेगीत जे प्रमाण तांणी मतदारांक वेळ दिलो, तें पळयत जाल्यार तांचे फुडले वाटचालीचो अदमास येता. भाजप उमेदवारीचे ते मुखेल दावेदार आसात. तांकां न्हयकारून तांच्या मनां आड तिकेट दिली जाल्यार ते आपलो राजकी रंग दाखोवंक शकतात इतली तांक आशिल्ले ते राजकारणी आसात. ताका लागून भाजपाची उमेदवारी कोणाक मेळटा हाचेर सगले कितें निंबून आसा.
हेर पक्षांची अतिस्तवा खातीर झूज
आदले बांदकाम मंत्री दीपक पावसकार वेंचणूक लडोवपाक इत्सूक आशिल्ल्याचे स्पश्ट संकेत तांणी दिल्यात. ते गोवा फॉरवर्डाच्या संपर्कांत आसात. गोवा फॉरवर्डाची तिकेट तांकां मेळटा काय दुसऱ्या आनीक कोणाक मेळटा हें पळोवचें पडटलें. मतदारसंघांतले उदेंते नेतृत्व आनी रिव्हॉल्युशनरी गोवन्स पक्षाचे फाटले विधानसभा उमेदवार विपीन नायक हांणी पक्षांतल्या अंतर्गत संघार्शाक लागून राजिनामो दिला. ताका लागून ह्या पक्षाचो उमेदवार रिंगणांत आसतलो काय ना हाचो अदमास बांदप कठीण आसा. आम आदमी पक्षाचो उमेदवार आसलो तरी व्हडलोसो फरक पडचो ना. एकंदरीत भाजप आनी मगो पक्षाची युती जायत जाल्यार हातूंतल्या एका पक्षाचो उमेदवाराक रिंगणांत आसचो ना. हाचे बराबर काँग्रेस आनी गोवा फॉरवर्डाची युती जायत जाल्यार एक उमेदवार रिंगणांत आसतलो.
—
बॉक्स
2022 विधानसभा वेंचणुकेंत उमेदवारांक मेळिल्लीं मतां
गणेश गांवकार (भाजप) 11,877
दीपक पावसकार (अपक्ष) 6,687
विनायक गांवस (मगो) 3,768
विपीन नायक (आरजीपी) 2,135
अनील गांवकार (आप) 846
गंगाराम लांबोर (अपक्ष) 554
खेमलो सावंत (काँग्रेस) 383
———
बॉक्स
सांवड्डें मतदारसंघातले आमदार
1989 मोहन आमशेकार
1994 विष्णू प्रभू
1999 विनय तेंडुलकार
2002 विनय तेंडुलकार
2007 अनील साळगांवकार
2012 गणेश गांवकार
2017 दीपक पावसकार
2022 गणेश गांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
