भांगरभूंय | प्रतिनिधी
पर्यटकांक अंजूणें धरण पळोवपाक घातक स्थिती
तीन म्हयन्यां सावन कठडो दुरुस्तीचे प्रतिक्षेंत
वाळपय: गोंयांत पावसान हाजेरी लायिल्ल्यान अंजूणें धरणांत उदकाचें प्रमाण वाडूंक लागलां. सैम पाचवो जायत आसा. येता त्या कांय दिसांनी गोंय- बेळगांव मजगतचो चोर्ला घांट वाठार आनी अंजूणें धरण पर्यटकां खातीर आकर्शण थारतलें. पूण हे सुवातेर पर्यटकांचे सुरक्षे खातीर उबारिल्ल्या लोखंडाचो राखणे कठडो फाटल्या तीन म्हयन्यां सावन मोडकुळेक आयला. ताची अजून दुरुस्ती केल्ली ना. ताका लागून पावसाच्या दिसांनी वाठारांत व्हड अपघात घडपाची भिरांत उक्तायतात. घडणूक घडल्यार ताका जापसालदार कोण असो प्रस्न लोकांनी उपस्थीत केला.
गोंय- बेळगांवाक जोडपी चोर्ला घांट मार्ग हो येरादारी बराबरच पर्यटनाचे नदरेन सामको म्हत्वाचो मानतात. पावसाच्या दिसांनी घांट वाठारांत खूबशे घसघशे, धुकें, पाचवी देगणां आनी अंजूणें धरणाचो विस्तीर्ण जलाशय पळोवपा खातीर हजारांनी पर्यटक हांगा भेटी दितात. ह्या सैमाचो आनंद सुरक्षीतपणान घेवचो हे खातीर रानां खात्यान घांट वाठारांत लोखंडाचे राखणे कठडो उबारिल्लो. फोटू काडप आनी सैमाचो आनंद घेवप हे खातीर सोयीचें जाल्लें.
पूण सुमार तीन म्हयन्यां पयलीं हो लोखंडाचो कठडो मोडून पडिल्ल्यान ताची दुरुस्ती अजून केल्ली ना. कठडो मोडिल्ल्यान पर्यटक आनी वाहन चालक देगणाचे कुशीक उबे रावत आशिल्ल्यान जिविताक गंभीर धोको निर्माण जाला. पावसाच्या दिसांनी दाट धुकें, निसरण जाल्लो रस्तो आनी पावसाक लागून दिसप मात्शें उणें जायत आशिल्ल्यान अपघाताची शक्यताय वाडल्या.
हांगा खोल देगण आसून राखणे कठडो नाशिल्ल्यान एकाद्याचो तोल वचून गंभीर दुर्घटणा घडूंक शकता. चड करून फोटू वा धरणाचे दृश्य पळोवपा खातीर खूबशे पर्यटक रस्त्याचे कुशीक उबे रावतात. अशा वेळार राखणे वेवस्था नासप ही सामकी गंभीर गजाल आशिल्ल्याचें थळाव्या नागरिकांचें म्हणणें आसा.
फाटल्या तीन म्हयन्यां सावन थळाव्या नागरिकां कडल्यान तशेंच नेमान प्रवास करपी वाहन चालकां कडल्यान संबंदीत विभागा कडेन सेगीत दुरुस्तीची मागणी जायत आसा. पूण अजून कसलीच ठोस अशी कारवाय जावंक नाशिल्ल्यान नागरिकां मदीं निरशेवणीचें वातावरण आसा. पावसाच्या दिसांनी पर्यटकांची संख्या गतीन वाडचे पयलींच रानां खात्यान हांगा नवो आनी घटमूट लोखंडाचो कठडो उबारचो, गरजेच्या त्या सुचोवण्या फलकांची वेवस्था करची, घातक वाठारांक सुरक्षीत वंय घालची तशेंच नेमान देखभाल घरची अशी मागणी नेट धरीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
