बसी आसूं वा टॅक्सी सगल्यांनी तंत्रगिन्यानाचो वापर करचो : मंत्री गुदिन्हो

भांगरभूंय | प्रतिनिधी

‘म्हजी बस’ येवजण सुरू

भांगरभूंय । प्रतिनिधी
मडगाव : खाजगी बस आसूं, कदंबा बस आसूं वा टॅक्सी आसूं, सगल्यांनी काळा वांगडा बदलून तंत्रगिन्यानाचो वापर करचो. डिजिटल बदलांतल्यान सगळ्यो सेवा एकाच प्लॅटफॉर्माचेर येवपाची गरज आसा. उदरगतीच्या देशांत आनी राज्यांत नवे टेक्नोलॉजीचो वापर जाता. डिजिटल सिस्टीम गेमचेंजर थारतली अशें मत येरादारी मंत्री मॉवीन गुदिन्हो हांणी उक्तायलें.

मडगांवां ‘म्हजी बस’ हे येवजणेची प्रायोगीक तत्वाचेर सुरवात जाली. ह्या वेळार मंत्री मॉवीन गुदिन्हो उलयताले. कार्यावळीक बांधकाम मंत्री निलेश काब्राल, कदंब अध्यक्ष उल्हास तुयेंकार, आमदार दिगंबर कामत आनी हेर अधिकारी हाजीर आशिल्ले.

कोविडाच्या काळांत कदंब म्हामंडळान बरी सेवा दिली. सुरवातेक 25 बसीं वरवीं ही येवजण सुरू केल्या. 187 बसींच्या खर्चाचें अंदाजपत्रक तयार केलां. जश्यो खाजगी बसी येतात तशी मंजुरीय दितात. ‘म्हजी बस’ ही येवजण अडेज वर्सां आदीं हाडिल्ली. पूण वित्त खात्यान हे येवजणे कडेन आडनदर केली. वित्त खात्यान विशय समजून घेवन येवजण चालीक लावची. ही येवजण अडेज वर्सां पयलीं सुरू जाल्ली जाल्यार आतां मेरेन वेवस्थीत चलपाची. खाजगी बस धनयांक इंधनाचे सबसिडी येवजणेंतल्यान कोवीड काळा पसुनच्या अर्जाचेर तत्काळ निर्णय घेवन सबसिडी मंजूर केली. पूण, अर्ज मंजूर केल्ल्याचें पळोवन उपरांत अर्ज सादर केले. तांतल्या कांय जाणांचीं अर्जा वांगडा योग्य कागदपत्रां नाशिल्लीं. ते मंजूर जावंक ना. 15 वर्सां पुराय जाल्लीं पूण बरे अवस्थेंत आशिल्ल्यो बसी चलोवपाक दितले. तशेंच नव्यो बसी रस्त्यार हाडपाची गरज आशिल्ल्यान हे संबंदी राज्य सरकार नव्यो बसी हाडपाची येवजण हाडपाचो येत्न करता. गोंयची येरादारी वेवस्था बरी करपाचो ह्या फाटलो हेत आसा. गावगिर्‍या वाठारांतल्या लोकांक सेवा दिवपाक कदंब म्हामंडळ सुरु केलां. विद्यार्थी, ज्येश्ठ नागरीक, सरकारी कर्मचार्‍यांक मेळपी सुविधायो खाजगी बसीन दिवपाची गरज आसा, अशें मंत्री गुदिन्हो हांणी फुडें म्हणलें.

राज्यांत वाडपी बसी उण्यो करपा खातीर ‘म्हजी बस’ येवजण हाडली. हातूंत फकत वाहक कदंबाचो आसतलो, पूण चालक खाजगी आसतलो. तांचे पयशे पंदरा दिसांनी दितले. सध्या 66 बसी नोंद आशिल्ल्यान सरकारा कडल्यान हे येवजणे खातीर रोखडेच साडेचार कोटी मंजूर केल्या अशें आमदार तुयेंकार हांणी सांगलें.

स म्हयन्यांनी इंटेलिजन्स ट्रान्सपोर्ट मॅनेजमेंट सिस्टीम हाचे वरवीं कदंबाच्या बसी वेळार ती बस खंय आसा हें कळटलें. अधिकार्‍यांनीय ही सुविधाय दिवपाचो यत्न करचो. बसी डिजिटल करपाचो यत्न करतले, अशें मंत्री गुदिन्हो हांणी म्हणलें.

नव्या काळांत डिजिटल प्लॅटफॉर्माचेर येवपाची गरज आसा. सरकारी अ‍ॅपार येवपाचें नासल्यार तांणी स्वताचो अ‍ॅप तयार करचो. हांतल्यान येरादारी वेवस्था सुदारतली, अशें मंत्र्यान म्हणलें.