बंदी उठचे पयलींच नुस्तेमारी सुरू
भांगरभूंय | प्रतिनिधी
मडगांव ः कोलव्यां दर्यादेगेवेल्या पारंपरीक नुस्तेकारांनी आपलीं बोटीं दर्यांत व्हरून नुस्तें धरपाक सुरवात केल्या. ह्या नुस्तेकारांनी शेनवारा हेर नुस्त्यां वांगडा व्हड प्रमाणांत सुंगटां धरल्यात.
राज्यांत फाटले दोन म्हयने बंद आशिल्लो नुस्तेमारी हंगाम 1 ऑगस्ट सावन सुरू जातलो. देखून नुस्तेकारांनी कामाक सुरवात केल्या. फाटले दोन म्हयने कोलवें दर्यादेगेर बंद करुन दवरिल्ल्या बोटींची बिरेस्तारा पुजा केली. हवामान बरें आसल्यार बोटी दर्यांत व्हरतले अशें नुस्तेकारांनी सांगिल्लें. ते प्रमाण शुक्रारा सावन पावसान विसव घेतिल्ल्यान कांय नुस्तेकारांनी बोटीं दर्यांत व्हेल्यो. शुक्रारा चड नुस्तें मेळ्ळें ना. पूण शेनवारा फातोडेंर बोटी घेवन दर्यांत गेल्ल्या नुस्तेकारांनी हेर नुस्ते धरलेंच, पुण ताचे वांगडाच व्हड प्रमाणांत सुंगटां धरल्यात.
नुस्तेंमारीचेर बंदी आशिल्ल्यान दोन म्हयने ताजें नुस्तें उण्या प्रमाणांत मेळटालें. पारंपरीक नुस्तेकार नुस्ते धरतले तेन्ना ताजें नुस्तें बाजारांत मेळटलें. मात ताचें मोल मळबाक तेंकिल्लेंच आसा. सामान्य मनशाक 200 ते 400 रुपया दिवन नुस्तें विकत घेवप परवडना, अशें एका नागरिकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
