भांगरभूंय | प्रतिनिधी
मुख्यमंत्री: गोम्स हांच्या पुतळ्याचें नावेली अनावरण
मडगांव: फ्रान्सीस लुईस गोम्स हांकां जयंती आनी पुण्यतीथ दिसा गोंय सरकारा कडल्यान आर्गां ओंपतले. हे विशींचो अध्यादेश काडटले. सरकार आमचे आसूं वा नासूं तरी लेगीत तांकां मान मेळटलो. सरकारा कडल्यान ह्या प्रकल्पाच्या हाचे फुडल्या कामां खातीर गरजेचें ते सहकार्य दितले अशें मुख्यमंत्री डॉ. प्रमोद सावंत हांणी सांगलें.
डॉ. फ्रान्सीस लुईस गोम्स हांच्या पुतळ्याच्या अनावरणाच्या निमतान नावेलींत कार्यावळ आयोजीत केल्ली. ह्या वेळार आदले राज्यसभा खासदार लुईझिन्य फालेरो, मंत्री आलेक्स सिक्वेरा, आमदार उल्हास तुयेंकार बी मानेस्त हाजीर आशिल्ले.
पुतळ्याच्या अनावरणा उपरांत मुख्यमंत्री डॉ. प्रमोद सावंत हांणी सांगलें, स्वातंत्र्य लढ्यांतल्या विसर पडिल्ल्या स्वातंत्र्य सैनिकाच्या पुतळ्याचें अनावरण करपाची संद मेळ्ळी हें भाग्य. फुडले पिळगेक गोम्स हांची म्हायती मेळोवपा खातीर हो पुतळो मार्गदर्शक थारतलो. गोम्स हांणी पुर्तुगेझांच्या काळांत अखंड भारताचो संकल्प मांडलो. पुर्तुगेझ विधानसभेंतूय तांणी भारताच्या स्वातंत्र्याचो, अखंड भारताचो संकल्प उलोवन दाखयलो. सत्ता ही लोकांच्या हातांत आसची हे तांचे विचार आशिल्ले अशें मुख्यमंत्री डॉ. प्रमोद सावंत हांणी म्हणलें.
तांणी मुखार उलयतना म्हणलें, तांचीं भाशणां पुरातत्व खात्याच्या संग्रहांत लेगीत आसात. तांचे विवीध भाशांचेर प्रभुत्व आशिल्लें. तांच्याच विधानसभेंत वचून तांच्या विरोधांत उलोवपाचें धाडस कोणेंच करूंक नासतलें. ‘द ब्राह्मीण’ ह्या पुस्तका वेल्यान धर्म आनी जातीच्या ते विरोधांत आशिल्ल्याचें दिसून येता. ह्या पुस्तकांत जात आनी धर्मा आड बरोवन कोणूय जाती धर्मा मुखार वचून विचार करपाचो विचार मांडिल्लो, अशें सांगतनाच डॉ. गोम्स हांची जयंती आनी पुण्यतीथ गोंय सरकारा वतीन उपजिल्होधिकाऱ्या कडल्यान आर्गां ओंपतले. हे खातीर अधिसुचोवणी जारी करतले. ताका लागून हाचे मुखार खंयच्याय सरकाराच्या काळांत तांकां मान मेळत रावतलो अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
