भांगरभूंय | प्रतिनिधी
वास्को, प्रतिनिधी: बायणा रवींद्र भवनाचें चिलर बसोवपाचें काम पुराय जालां. बेगीनूच कुलिंग टॉवर उबारतले. ताका लागून रवींद्र भवनांत आशिल्लीं मुरगाव उपजिल्हाधिकारी, मामलेदार कार्यालय तशेंच वास्को शार भलायकी केंद्र थंयच्यान काडपाची मागणी रवींद्र भवनाचे अध्यक्ष जयंत जाधव आनी कार्यकारिणी समितीन केल्या. हे संबंदी पत्रां कार्यालयांक दिलीं. फेब्रुवारी मेरेन रवींद्र भवनाचें मुखेल प्रेक्षक घर वीर सावरकर सुरु जातलें अशी आस्त तांणी उक्तायली. .
रवींद्र भवनाच्यो एसी इबाडिल्ल्यान थंय नवीं वॉटर कुलींग यंत्रणां बसयता. ताका लागून फाटलीं तीन चार वर्सां रवींद्र भवनाचो मुखेल प्रेक्षगृह बंदूच आसा. सध्या मनोहर पर्रीकर सभाघर, परिशद हॉलाचो उपेग करता. मुखेल प्रेक्षकघर नाशिल्ल्यान कलाकार, रसिकांची गैर वेवस्था जाता. ह्या प्रेक्षकघरांत स्नेहसंमेलन, हेर कार्यावळी तशेंच एकांकिका, नाटकां, म्युझिकल शो अश्यो कार्यावळी जातात. आतां नवीन यंत्रणांनी म्हत्वाचो चिलर बसयला. कुलींग टॉवराची उपकरणां बेगीनूच पावतलीं. ताका लागून रवीद्र भवनाचें मुखेल प्रेक्षक घर बेगीनूच विंगड विंगड कलाकार, रसीक हेरांचे सेवेक उपलब्ध जातलो अशें जयंत जाधव हांणी सांगलें.
हांगच्या मुरगांव पालिका कार्यालय इमारतीच्या दुरुस्तीचे आनी नुतनीकरणाचें काम हातांत घेतल्या उपरांत थंय आशिल्लें मुरगांव उपजिल्होधिकारी कार्यालय, मामलेदार कार्यालय, वास्को शार भलायकी केंद्र तात्पुरतें रवींद्र भवनाचे मेकळे सुवातेर हालयल्लें. हीं कार्यालयां थंय फाटल्या दोन वर्सां सावन आसात. पालिका इमारतीच्या नुतनीकरणाचें काम पुराय जालां. थंय आतां म्युनिसिपल हायस्कुलाचे वर्ग भरपाक लागल्यात. पालिका कार्यालयाचें काम सुरु जालां. पूण थंय मुरगांव उपजिल्होधिकारी कार्यालय, मुरगांव मामलेदार कार्यालय, भलायकी केंद्र हलोवपाच्यो कसल्योच हालचाली दिसनात. मुरगांव पालिका ह्या कार्यालयांक उरिल्लें भाडे दिवपाची मागणी करता. ताका लागून हीं कार्यालयां हालोवपा विशीं आडखळ येता हें समजता.
मात बेगीनूच रवीद्र भवनाचें मुखेल प्रेक्षक घर सुरु जाल्ल्यान थंय कार्यावळींची बुकींग सुरु करतले. ताका लागून संबंदीत कार्यालयां थंयच्यान हालोवची अशी मागणी जाता. ही कार्यालयां थंय उरल्यार थंय रसिकां खातीर त्रासाचें जातलें अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
