भांगरभूंय | प्रतिनिधी
पर्रीकार राष्ट्रीय मूट कोर्ट कार्यावळीचें उक्तावण
पणजी, प्रतिनिधी : फुडाराक योग्य कायदे आनी योग्य धोरणांच्या आदारानुच उदरगत शक्य आसा, अशे मुख्यमंत्री डॉ. प्रमोद सावंत हांणी सांगलें. राजकारण, सुशासन आनी धोरणाची निर्मिती हातुंत सर्गेस्त मनोहर पर्रीकार हेच म्हजे आदर्श आसात, अशेंय तांणी म्हणलें.
गोंय विद्यापीठांत मनोहर पर्रीकार स्कूल ऑफ लॉ हांगां आयज पर्रीकार राष्ट्रीय मूट कोर्ट आनी पोलिसी हेकथोन परिशदेचें उक्तावण जालें. ह्या वेळार मुख्यमंत्री मुखेल सोयरे म्हूण उलयताले. कायदो मंत्री आलेक्स सिकेरा, गोंय विद्यापीठाचे कुलगुरू प्रा. हरिलाल मेनन, मनोहर पर्रीकार स्कूल ऑफ लॉचे डीन प्रा. राजेंद्र गाड आनी हेर मानेस्त हाजीर आशिल्ले.
कायदो हो समाजाच्या सशक्तीकरणा खातीरचें एक शस्त्र आसा, अशी मनोहर पर्रीकार हांची धारणा आशिल्ली. समाजाच्या हिताक सर्वोच्च प्राधान्य दिवन कायदो तयार जावपाक जाय. कायद्याच्या विद्यार्थ्यानी आउट ऑफ बॉक्स विचार करपाची गरज आसा. विकसित भारत 2047 चें सपन प्रधानमंत्री नरेंद्र मोदी हांणी दवरला. तें विद्यार्थी आनी तरणाट्यांच्या सहकार्या बगर पुराय जावप अशक्य आसा, अशें मुख्यमंत्र्यान सांगलें. आयज आनी फाल्या अशे दोन दीस परिशद चलतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
