फा. बोलमॅक्स हांच्या जामीन अर्जाचेर फाल्यां सुनावणी

भांगरभूंय | प्रतिनिधी

मडगांव : चिखले, वास्को चर्चचे धर्मगुरु बोलमॅक्स परेरा हांणी छत्रपती शिवरायां विशीं आक्षेपार्ह विधानां केल्ल्यान तांचे आड वास्को पुलीस स्टेशनांत गुन्यांव नोंद केला. हे विशीं मडगांव सत्र न्यायालयांत अटकपूर्व जामीन अर्ज सादर केला. सोमारा सुनावणे वेळार वास्को पुलिसांनी म्हणणें मांडपा खातीर वेळ मागिल्ल्यान सुनावणी मुखार धुकल्ली.
फा. परेरा हांणी कांय दिसां पयलीं चर्चींत हाजीर आशिल्ल्यांक मार्गदर्शन करतना छत्रपती शिवाजी महाराजां विशीं विधान केल्लें. ताचो व्हिडिओ व्हायरल जाले उपरांत तांच्या वक्तव्या विशीं कुंकळ्ळी, काणकोण, कुडचडें पुलीस स्टेशनांचेर कागाळी नोंद जाल्यात. उपरांत फादरान माफीय मागिल्ली.
कागाळ करून 24 वरां उलगलीं तरी पुलीस प्रशासना कडल्यान कारवाय जावंक नाशिल्ल्यान शिवप्रेमी तिडकले आनी वास्को पुलीस स्टेशनाचेर तांणी गर्दी केली. जो मेरेन परेरा हांकां अटक करिना तो मेरेन हांगच्यान हालचेना अशें गर्दी केल्ल्या शिव प्रेमींनी सांगलें.
दक्षीण गोंय पुलीस अधीक्षका वांगडा वास्को पुलीस निरीक्षकांनी शिवप्रेमींक समजावपाचो येत्न केलो. पूण कोणूच आयकुपाक तयार नाशिल्ले. पुलिसां कडल्यान फा. परेरा हांचेर भादंसंच्या कलम 295 आनी 504 खाला गुन्यांव नोंद केलो. तशेंच ह्यान फुडें कारवाय करतले, अशें आस्वासन दिल्या उपरांत शिवप्रेमी पुलीस स्टेशना वयल्यान भायर सरले. तेच रातीं चिखले चर्चीच्या वाठारांत फा. परेरा हांकां समर्थन दिवपाक तांच्या समर्थकांनी मेणवात मिरवणूक काडली.
हिंदूंच्यो भावना दुखावल्ले खातीर वास्को पुलिसांनी गुन्यांव नोंद केल्ल्यान फा. परेरा हांकां अटक जावपाची शक्यताय आसा. तांणी मडगांव सत्र न्यायालयांत अटकपुर्व जामिना खातीर अर्ज सादर केला. सोमारा सकाळीं न्यायालयांत ह्या प्रकरणांत सुनावणी जाली तेन्ना फा. बोलमॅक्स हांच्या वकीलां कडल्यान अंतरीम जामीन दिवपाची मागणी केली. वास्को पुलिसांनी हे विशीं कागदपत्रां सादर करून म्हणणें मांडपा खातीर वेळ मागलो तेन्ना न्यायालयान मंगळारा सकाळीं सुनावणी घेवपाचें निश्चीत केलें.