भांगरभूंय | प्रतिनिधी
प्रतिनिधीः वास्कोतल्या चिखली चर्चीचे धर्मगुरू बोलमॅक्स पेरेरा हांणी छत्रपती शिवाजी महाराजा विशीं आक्षेप घेवपी उलोवप केल्ल्यान तांचे आड वास्को पुलीस स्टेशनार गुन्यांव नोंद केल्लो. हे फाटभुंयेर तांणी मडगांवच्या सत्र न्यायालयांत अटकपूर्व जामीन अर्ज सादर केल्लो. ताचेर मंगळारा सुनावणी जावन परेरा हांकां अटकपूर्व जामीन मंजूर केलो.
फा. परेरा हांणी कांय दिसां पयलीं चर्चींत हाजीर आशिल्ल्यांक मार्गदर्शन करतना छत्रपती शिवाजी महाराजा विशीं वादग्रस्त उलोवप केल्लें. ताचो व्हिडिओ व्हायरल जाले उपरांत कुंकळ्ळी, काणकोण, कुडचडें आदीं गोंयांतल्या पुलीस स्टेशनांनी कागाळी नोंद जाल्ल्यो. गोंयभरच्यान तिडकिच्यो प्रतिक्रिया आयले उपरांत फा. परेरा हांणी भौशीक रितीन आक्षेपार्ह उलोवपा विशीं माफी मागिल्ली. कागाळी केले परांत 24 वरां जावन लेगीत पुलीस कारवाय जावंक नाशिल्ल्यान शिवमोगी आक्रमक जाल्ले. वास्को पुलीस स्टेशना भायर शिवमाेगींनी गर्दी करून जो मेरेन परेरा हांकां अटक जायना तो मेरेन पुलीस स्टेशना मुखा वयल्यान वच्चे नात अशी शिटकावणी दिल्ली.
दक्षीण गोंय पुलीस अधिक्षका सयत वास्काचे पुलीस निरिक्षक शिवमोगींची समजूत काडटाले. तरी कोणूच कांयच आयकून घेवपाचे मनस्थितींत नाशिल्ले. निमाणें पुलिसांनी फा. परेरा हांचे आड गुन्यांव नोंद केलो आनी उपरांत शिवमोगी घडणूक थळा वयल्यान गेल्ले. ते रातींच चिखली चर्चीच्या प्राकारांत फा. बोलमॅक्स परेरा हांकां समर्थन दिवपा खातीर क्रिस्तांव समुदाया वतीन गर्दी केल्ली.
सोमारा फा. बोलमॅक्स हांच्या जामीन अर्जाचेर सुनावणी जाल्ली तेन्ना वास्को पुलिसांनी तांचे म्हणणें मांडपा खातीर वेळ मागिल्ल्यान मंगळारा सुनावणी दवरली. मंगळारा पुलिसांनी सादर केल्ल्या म्हणण्या प्रमाण फा. बोलमॅक्स हांणी चवकशेक सहकार्य केल्यार तांचे अटकेची गरज नाशिल्ल्याचें सांगलें. मडगांव सत्र न्यायालयांत जाल्ले सुनावणे वेळार 20 हजार रुपयांचो वैयक्तीक बॉण्ड आनी तितलेच रकमेचो हमिदार अशा अटींचेर न्यायालयान फा. बोलमॅक्स परेरा हांकां थाकाय दिवन अटकपूर्व जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
