भांगरभूंय | प्रतिनिधी
फोंडें: पेटके धारबांदोड्यां सुरंगी फार्मांत बिरेस्तारा दनपारां जखमी अवस्थेंत मेळिल्ल्या बिबट्याक सांजे वेळार उपचार करचे आदींच मरण आयलें. अज्ञात मनशान लायिल्ल्या फांसांत शिरकल्ल्यान ताका मरण आयलें. रान खात्याच्या अधिकाऱ्यांनी चवकशी करपाक सुरवात केल्या.
मेळिल्ले म्हायती प्रमाण बिरेस्तारा दनपारां 3 वरांच्या सुमाराक फार्मा लागसार काम करपी कामगारांक जखमी अवस्थेंत बिबटो दिसलो. तांणी ताची म्हायती कुळें रान विभागाच्या कार्यालयाक दिली. ते प्रमाण रान विभागाचे अधिकारी रवी शिरोडकार हांणी कर्मचाऱ्यां सयत घडणुकेचे सुवातेर येवन पळोवणी केली. त्या वेळार बिबटो जिवो आशिल्लो. जखमी बिबट्याक धरचे खातीर सगळयांत आदीं बोंडला प्राणी संग्रहालयाचे वेवस्थापक परेश परब हांकां म्हायती दिवन आपोवन हाडलो. पूण परेश परब घडणुकेचे सुवातेचेर पावचे आदींच सांजेच्या 6 वरांचेर जखमी बिबट्याक मरण आयलें.
परेश परब हांणी मरण आयिल्ल्या बिबट्याची पळोवणी केले उपरांत पत्रकारांक म्हायती दितना सांगलें, दोन वा तीन दिसां आदीं बिबटो फांसांत शिरकल्ल्याचो दुबाव आसा. बिबट्याच्या मरणाची खोलायेन चवकशी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
