भांगरभूंय | प्रतिनिधी
मदलोमाज मांदऱ्यां दुयेंतीक व्हरचो पडलो स्टॅचरा वयल्यान
पणजी: मदलोमाज मांद्रें हांगासरल्या प्रदीप कोरगांवकार हांच्या घरा मेरेन रस्तो आनी वेवस्थीत पांयवट नाशिल्ल्यान तांकां खूबशा समस्यांक तोंड दिवचें पडटा. 200 वर्सां पयलींच्या ह्या घरां मेरेन वचपा खातीर वेवस्थीत वाट नाशिल्ल्यान तांची गैरसोय जाता.
काल (आयतारा) प्रदीप कोरगांवकार हांची जाण्टी आवय दुयेंत पडली. तिका घरांतल्यान व्हरपा खातीर घरा मेरेन अॅम्बुलन्स येवंक शकली ना. तरी लेगीत अॅम्बुलन्स चालकान गंभीरताय वळखून रस्त्या पसून कांय अंतराचेर जी व्यक्ती दुयेंत आशिल्ली थंय मेरेन व्हरपाचो यत्न केलो. पूण घरा पसून 100 मिटर अंतरा वयल्यान जाण्टे बायलेक स्टॅचराचेर घालून अॅम्बुलन्सी मेरेन हाडिल्ल्याचें चित्र दिसून आयलें.
वेवस्थीत वाट नाशिल्ल्यान जाण्टे नागरीक आनी दुयेंती मनशांक हाचो त्रास जाता. खूबशे फावटी आपत्कालीन वाहनां वाट नाशिल्ल्यान घरा मेरेन पावनात. हाका लागून दुयेंत मनशांक वा जाण्ट्या मनशांक स्टॅचराचेर घालून वाहना मेरेन व्हरचें पडटा. हातूंत खूबसो वेळ फुकट वता.
2016 वर्सा उजो लागून खूबशे लुकसाण जाल्लें. त्या वेळार उजो पालोवपा खातीर उजो पालोवपी दळाक आपयलें. पूण घरा मेरेन पावपा खातीर वेवस्थीत रस्तो नाशिल्ल्यान दळाचो बंब घरा मेरेन पावूंक शकलो ना.
हांगा पुरातन अशे गिरोबाचें देवूळ आसा. देवूळ वाठारांतूच हीं घरां आसात. ह्या घरांक वेवस्थीत पांयवाट ना. ताका लागून पावसाच्या दिसांनी व्हड प्रमाणांत अडचणी निर्माण जातात. ह्यो अडचणी पयस करपा खातीर आतां तरी प्रशासनान यत्न करचे अशी मागणी ग्रामस्थांनी केल्या.
आतां मेरेन खूबशा आमदारांनी रस्तो जातलो म्हूण आस्वासनां दिलीं. पूण तीं आस्वासनां केन्नाच पुराय जालीं नात. आयज थंयचे लोक रस्त्याची वाट पळयत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
