भांगरभूंय | प्रतिनिधी
कोरगांव: नेटाचो पावस आनी वाऱ्याक लागून पेडणें म्हालांत तीन घरांचें लुकसाण जालें, जाल्यार म्हालांत विवीध सुवातांनी रस्त्यार आनी विजेच्या सरयांचेर झाडां पडपाच्यो घडणुको घडल्यो.
कांय कडेन रस्ते उदका खाला गेल्ल्याचें दिसून आयलें. सावळवाडो, पेडण्यां रामकृष्ण सावळ देसाय हांच्या घराचेर, हसापूरा दशरथ मळीक हांच्या घराचेर जांबळीचें झाड जाल्यार हसापूर हांगा बंद आशिल्ल्या एका घराची वणत कोसळ्ळी.
हाचे बगर वशालबाग धरगळे, उगवें, पेठेचोवाडो कोरगांव, केरी, मावूसवाडो पेडणें, वजरी बी सुवातांनी रस्त्यार आनी वीज वाहिन्यांचेर झाडां पडपाच्यो घडणुको घडल्यो. पेडणें उजो पालोवपी दळाचे अधिकारी नामदेव पवार हांच्या मार्गदर्शना खाला हवालदार डॉमनीक मार्टीन, चालक प्रशांत सावळ देसाय, यशवंत नायक, धनंजय वस्त, कृष्णा नायक, श्रीनेश कोरखणकार, हवालदार प्रदीप आसोलकार, मेंडोंसा मातायश, शेखर मयेंकार, आशिर्वाद गाड, सहदेव परब, सर्व्हेश पार्सेकार हांणी ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
