भांगरभूंय | प्रतिनिधी
तिस्क-उसगांवां पुलिसांक समस्यांक दिवचें पडटा तोंड
फोंडें: तिस्क-उसगांवां पुलीस आवट पोस्ट इमारतीची दयनीय अवस्था जाल्ल्यान पुलीस कर्मचाऱ्यांक खूबश्या समस्यांक तोंड दिवचें पडटा. फाटलीं कितलींशींच वर्सां इमारतीची दुरुस्ती करूंक नाशिल्ल्यान पावसाच्या दिसांनी पाख्यांतल्यान गळटी लागून कचेरेंत उदक येत आशिल्ल्याचें प्रकार घडत आसतात. इमारतीच्या पयल्या माळ्या वयल्या स्लॅबाचो भाग कोसळपाचे प्रकार अदीं मदीं घडत आसतात. ताका लागून सरकारान दखल घेवन तिस्क-उसगांव पुलीस आवट पोस्ट इमारतीची दुरुस्ती करपाची मागणी लोकां कडल्यान जायत आसा.
धारबांदोडें, उसगांव ह्यो दोन पंचायती खण वाठारांत येतात. खणी बंद आशिल्ल्यान मिनाची येरादारी बंद आसा. फाटल्या कांय वर्सां सावन उसगांव वाठारांत अपघात तशेंच ल्हान व्हड गुन्यांव पुलीस आवट पोस्टार नोद जायत आसात. पूण पुलीस आवट पोस्ट इमारतीची दुरुस्ती करूंक नाशिल्ल्यान कागाळ घेवन वचपी लोकांची पुलिसां कडेन पळोवपाची नदर बदलत आसा.
आवट पोस्टार दोन हवालदारा सयत वट्ट 10 कर्मचारी वर्ग दवरला. इमारतीची दुरुस्ती अजून मेरेन केल्ली ना. पयल्या माळ्यार आशिल्लें पांच वस्तींघरां वापर नासतना तशींच पडून आसात. पुलीस कर्मचाऱ्यांचे सोयी खातीर वस्तीघराची लेगीत दुरुस्ती करपाची गरज आसून तांची स्थिती सामकी बिकट जाल्या. पावसाच्या दिसांनी गळटी जायत आशिल्ल्यान वस्तीघरांत उदक येत आशिल्ल्याचें दिसून येता.
उसगांव पंचायत वाठारांत एमआरएफ, नेस्ले, पी अॅण्ड जी आनी हर संवसारीक दर्ज्याच्यो कंपनीं कार्यरत आसात. विवीध कंपनीं मदीं व्हड प्रमाणांत गोंया भायले कामगार काम करतात. तशेंच खण वाठार आशिल्ल्यान गोंया भायल्या कामगारांचो आंकडो फाटल्या कांय वर्सां सावन वाडला. ताका लागून वाठारांत गुन्यांवांनी वाड जाल्ल्याचें दिसून येता. खणी बंद आसून लेगीत चडश्या अपघातांची संख्या वाडल्या. तातूंत म्हादय आनी दुदसागर न्हंयंत बुडून मरण येवपाच्या प्रकारांनी वाड जाल्या.
सेगीत धांवपळींत आशिल्ल्या पुलीस कर्मचाऱ्यांक कचेरेंत आयले उपरांत बरी सुविधा मेळप गरजेची आसा. इमारतीची दयनीय अवस्था जाल्ल्यान कर्मचाऱ्यांक खूबशे त्रास सोंसचे पडत आशिल्ल्याचें दिसून येता. फोंडें पुलीस स्टेशनाचे हद्दींत शिरोडें, बेतोडें, फर्मागुडी, कुंडय, माशेल आनी तिस्क उसगांव हांगा आवट पोस्ट कार्यरत आसात. तातूंत म्हाड्डोळ पुलीस आवट पोस्टाचो दर्जो वाडोवन पुलीस स्टेशनाचो दर्जो दिला.
धारबांदोडेंचे सदानंद गावडे हांणी पंचायत वाठारांतल्या लोकांचे सोयी खातीर सुरू केल्ल्या पुलीस आवट पोस्टाचो दर्जो वाडयतना पुलीस कर्मचाऱ्यांक बरी सुविधा दिवपाचो यत्न जावंक जाय. कागाळ घेवन वचपी लोकांक इमारती कडेन पळोवन भिरांत दिसता. हेर वाठारांतल्यान कचेरेंत येवपी पुलीस कर्मचाऱ्यांक न्हिदपा खातीर वेवस्था लगीत सारकी करपाची गरज आसा. बंद आशिल्ल्या वस्तीघराची दुरुस्ती करपा खातीर अजून मेरेन यत्न जावंक नाशिल्ल्याचें दिसून येता. गृह मंत्री ह्या नात्यान मुख्यमंत्री डॉ. प्रमोद सावंत हांणी स्वता लक्ष दिवन पुलीस आवट पोस्टाचो दर्जो वाडोवपाचो यत्न करचो अशें तांणी म्हणलें.
तिस्क उसगांवां पुलीस आवट पोस्ट सद्या बिकट स्थितींत उबें आसा. तेच स्थितींत पुलीस कर्मचारी दीस-रात काम करीत आसतात. दारां लेगीत पेड्डेर जाल्ल्यान अदीं मदीं जिवणीं लेगीत आवट पोस्टांत प्रवेश करतात. ताका लागून पुलीस कर्मचाऱ्यांच्या जिवाक घात निर्माण जाला अशें दामू शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
