भांगरभूंय | प्रतिनिधी
पूण नियमीत भरतींत वांटो घेवपाक पिरायेची मर्यादा सदळ
पणजी: भौशीक बांदकाम खात्याच्या (पीडब्ल्यूडी) कामगार पुरवण सोसायटींत तात्पुरतो दर्जो प्राप्त जाल्ल्या कामगारांक नियमीत करपाचो आदेश जारी करपाक मुंबय उच्च न्यायालयाच्या गोंय खंडपिठान न्हयकार दिला. पूण ह्या कंत्राटी कामगारांक नियमीत भरतींत वांटो घेवपा खातीर पिरायेची मर्यादा सदळ करपाचो आदेश सरकाराक दिला. हे विशींचो आदेश न्या. एम. एस. कर्णीक आनी न्या. भारत देशपांडे ह्या दोन वांगडी खंडपिठान दिला.
ह्या प्रकरणांत रुपेश गांवकार, श्यामसुंदर कोठवाले आनी हेर 350 जाणांनी मुंबय उच्च न्यायालयाच्या गोंय खंडपिठांत याचिका दाखल केली. तातूंत तांणी राज्य सरकार, सचीव (पीडब्ल्यूडी), प्रधान मुख्य अभियंतो (पीडब्ल्यूडी), सचीव (कार्मीक खातें) आनी पीडब्ल्यूडी कामगार पुरवण सोसायटीक प्रतिवादी केले. तातूंत तांणी पीडब्ल्यूडींत फाटल्या 20 वर्सां परस चड काळ कुशल, अकुशल पदार सोसायटी वतीन कंत्राटी पद्दतीन सेवा दीत आसात. तांकां पीडब्ल्यूडींत वयल्या रित्या सुवातांचेर आस्पावन घेवन नियमीत करचें. तशेंच पदां रितीं नासल्यार नवीं पदां तयार करून नियमीत भरती करपाची मागणी याचिकादारान केली. तशेंच ह्या कर्मचाऱ्यांक 1 एप्रील 2023 सावन नियमीत करपाची मागणी याचिकेंत केल्ली.
भौशीक बांदकाम खात्यांत फाटल्या खूबशा वर्सां सावन कुशल आनी अकुशल पदा खातीर कंत्राटी पद्दतीचेर सेवा दिताले. त्या कर्मचाऱ्यांक सरकारान 2023 वर्सा सोसायटी स्थापन करून आस्पाव घेतिल्ले. उपरांत सरकारान तांकां खात्यांत नियमीत करतले अशें आस्वासन दिल्लें. तशेंच ते विशीं सरकारान मंत्रीमंडळ बसका घेवन कांय अटी घाल्ल्यो.
त्या वेळार सरकारान टप्प्याटप्प्यान तांकां खात्यांत आस्पावन घेवपाचें थारायिल्लें. हे विशीं आदले मुख्यमंत्री मनोहर पर्रीकार हांणी 7 सप्टेंबर 2013 दिसा तांकां नियमीत करपाच्या प्रस्तावाचेर सय केल्ली. पूण अशें आसतना त्या कर्मचाऱ्यांक कुशीक दवरून खात्यान वेळावेळार नव्या कर्मचाऱ्यांची भरती केल्ली. हाका विरोध करून कर्मचाऱ्यांनी वेळावेळार न्यायालयांत धांव घेतिल्ली.
अशें आसून लेगीत कांयच जायत नाशिल्ल्यान वयल्या याचिकादारांनी 2021 वर्सा परतून खंडपिठांत धांव घेतली. हे विशीं मंत्रीमंडळ बसकेंत कसलोच निर्णय घेतलो ना. तशेंच हे विशीं राज्यपालांनी आदेश जारी केलो ना. ताका लागून फायलीचेर मारिल्लो शेरो गृहीत धरूंक येनाशिल्ल्यान तांकां नियमीत करूंक येनाशिल्ल्याचो दावो सरकारान खंडपिठांत केलो. ह्या प्रकरणांत खंडपिठान दोनूय पक्षाची बाजू आयकून घेतले उपरांत वयलो आदेश जारी करून याचिका निकालांत काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
