भांगरभूंय | प्रतिनिधी
वास्को: कळमेल्ली उदका पायपलायनींतल्यान व्हांवपी उदका आडावन दवरपा खातीर उदका पुरवण विभागाच्या कामगारांनी एक वेगळीच तकली लडयली. पूण उदका पायपलायनींतल्यान व्हांवपी उदक अजून व्हांवतूच आसा. दिसभरांत हजारांनी लिटर उदक फुकट वचत आशिल्ले खातीर समाज कार्यकर्ते शंकर पोळजी हांणी तिडक उक्तायल्या. ह्या प्रकरणांत भौशीक बांदकाम मंत्री निलेश काब्राल हांणी लक्ष दिवपाची गरज आशिल्ल्याचें तांणी म्हणलें.
वास्को हांगासरल्या बेलाबाय वाठारांत मोटी उदका पायपलायन कळमेल्ल्यान तिका मोटो बुराक पडलो. तातूंतल्यान हजारांनी लिटर उदक व्हांवून वचत आसा. हो प्रकार लक्षांत येतकूच त्या उदका पायपलायनीक पेड्डेर जाल्ल्या टायराचो ट्यूब गुठलावपाची तकली लडयली. पूण लडयिल्ली तकली कांयच उपेगाची थारली ना.
त्या उदका पायपलायनींतल्यान उदक व्हांवपाचो प्रकार बंद जाल्लो ना. हजारांनी लिटर उदक फुकट वचत आसतना ही पायपलायन दुरुस्त वा नवी घालपाची बुद्ध संबंदितांक नाशिल्ले खातीर शंकर पोळजी हांणी अजाप उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
