पाटवळ- खोतोडेंचो पूल अशीर, अपघाताचो धोको
भांगरभूंय | प्रतिनिधी
वाळपय: पाटवळ – खोतोडेंचो अशीर आशिल्लो आदलो पूल दुबळो जाला. ह्या पुला वयल्यान वाहनांची गर्दी वाडिल्ल्यान अपघात जावपाची शक्यताय आसा. तशेंच बाराजण ते पाटवळ मेरेनचो रस्तो अशीर आशिल्ल्यान फाटलें वर्सभर दोन- तीन अपघात हांगा घडल्यात. ह्या अशीर रस्त्या वेल्यान विद्यार्थी प्रवास केल्ल्यान धोको निर्माण जाला. विद्यार्थ्यांचे सुरक्षितताये खातीर हांगा सरकारान उपाय करपाचे अशी मागणी थळावे करतात.
ह्या अशीर पुलाक लागून हांगा खुबशे अपघात जाल्यात. म्हत्वाचें म्हळ्यार ह्या रस्त्या वयल्यान वाहनांची गर्दी वाडल्या. ताका लागून अपघाताचो भंय आनीक वाडला. वाळपयच्या मोलें वचपी चडशीं वाहनां पाटवळ गावातल्यान यो- वच करतात. ह्या अशीर रस्त्या वयल्यान खुबशीं वाहनां वेगान गेल्ल्यान थळाव्यांचे सुरक्षिततायेचो प्रस्न निर्माण जाला. तशेंच फाटल्या वर्स भरांत तीन परस चड अपघात घडिल्ल्यान विद्यार्थ्यांक धोको निर्माण जाला.
पाटवळ हांगचो आदलो अशीर, दुबळे अवस्थेंत पूल सदांच वाहनांनी भरिल्लो दिसता. तशेंच पुलाचे दोनूय वटेन राखणे खातीर कांयच नाशिल्ल्यान वाहन पुला वयल्यान सकयल कोसळपाची शक्यताय आसा. मुखेल म्हळ्यार वाहन चालकांक अशीर रस्त्यार धोको आशिल्ल्याच्यो सुचवण्यो दिवपी तक्टेय हांगा नात.
सुमार 3 म्हयन्यां आदीं हांगा तीन दोन चाकींचो अपघात जाल्लो. तातूंत दोग जाण जखमी जाल्ले. ताका लागून वाहनांचो वेग उणो करपा खातीर स्पिडब्रेकर घालपाची मागणी लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
