भांगरभूंय | प्रतिनिधी
-देशाची म्हत्वाची गुपीत म्हायती भाैशीक केल्ल्याचो आरोप
लाहोरः पाकिस्तानचे आदले प्रधानमंत्री आनी पीटीअायचे मुखेली खानी हांकां सीफर प्रकरणांत न्यायालयान 10 वर्सांची बंदखणीची ख्यास्त केल्या. तशेंच इम्रान खान हांचे आदले सहयोगी आनी आदले परराष्ट्र मंत्री शाह महमूद कुरैशी हांकांय 10 वर्सांची ख्यास्त जाल्या. इम्रान खान आनी महमूद कुरैशी हांच्या विरोधांत सीफर प्रकरण हे राष्ट्रीय सुरक्षे कडेन संबंदींत आसा. इम्रान खान हांणी म्हत्वाची गुपीत म्हायती भौशीक केल्ल्याचो आरोप तांचेर आसा.
इम्रान खान आनी तांचे सहकारी आनी आदले परराष्ट्र मंत्री शाह महमूद कुरैशी हांकांय 10 वर्सांची बंदखणीची ख्यास्त जाल्या. लोकसभा वेंचणुकेचे फाटभुंयेर इम्रान खान हांकां हो व्हड धपको मानतात. ताका लागून पाकिस्तानच्या राजकारणांत खवदळ पडला. न्यायालयाच्या ह्या निर्णयाक लागून इम्रान खान हांच्या समर्थकां मदीं अस्वस्थताय निर्माण जाल्या.
————
सीफरचे प्रकरण कितें आसा?
सीफरचे हें प्रकरण राष्ट्रीय सुरक्षे कडेन संबंदींत आसा. म्हत्वाची गुपीत म्हायती वैयक्तीक कारणा खातीर वापरिल्ल्याचो इम्रान खान हांचेर आरोप आसा. सत्तेंतल्यान बेदखल जाले उपरांत इम्रान खान हांणी थेट अमेरिकेचेर आरोप केल्लो. आपणाक सत्तेंतल्यान बेदखल करपा फाटल्यान अमेरिकेचो हात आशिल्ल्याचो आरोप इम्रान खान हांणी केल्लो. इम्रान खान हांणी आपल्या राजकी फायद्या खातीर वादग्रस्त गजाली भौशीक केल्ल्यो. ताकाच सीफर अशें म्हणटात.
—————–
पाकिस्तानांत 8 फेब्रुवारीक वेंचणूक
पाकिस्तानांत 8 फेब्रुवारीक लोकसभा वेंचणूक जावपाची आसा. ताचे पयलीं आदले प्रधानमंत्री नवाज शरीफ पाकिस्तानांत पावले. तांणी 2019 त पाकिस्तान सोडिल्ले आनी ब्रिटनाक रावताले. पूण उच्च न्यायालयान तांकां जामीन मंजूर केले उपरांत नवाज शरीफ पाकिस्तानांत परतल्यात. आतां वेंचणुकां खातीर फक्त 9 दीस उरिल्ले आसतना इम्रान खान हांकां 10 वर्सांची बंदखणीची ख्यास्त जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
