भांगरभूंय | प्रतिनिधी
म्हापशें: आल्तो, पर्वरे श्रीराम प्रतिश्ठापना सुवाळ्या निमतान उबारिल्ले फलक पिंजिल्ल्या प्रकरणांत पर्वरी पुलिसांनी 29 वर्सा पिरायेच्या आनी तकलेन सारको नाशिल्ल्या तरणाट्याक पुलिसांनी अटक केली. हो दुबावीत तरणाटो दिसवड्या वयलो कामगार आसून तो उत्तर प्रदेशांतलो आसा.
22 वेर अयोध्येंत जावपी श्रीराम प्राणप्रतिश्ठापनाच्या सुवाळ्या निमतान आल्तो पर्वरे मॉल दी गोवा मुखार पिळर्ण पंचायत वाठारांत साळगांव भाजपा मंडळा वतीन फलक उबारिल्लो.
हो फलक तशेंच ओ कोकेरो जंक्शना कुशीचो फलक सकाळीं पिंजिल्ल्याचें श्रीराम भक्तांचे नदरेक आयलें. तांणी घडणुकेचो निशेध नोंद करून पर्वरी पुलिसांक म्हायती दिली. तशेंच आमदार केदार नायक हांणीय घडणूक थळार धांव घेवन तिडक उक्तायली आनी धर्मीक भावना दुखोवपाचो प्रकार करप्याक अटक करपाची सुचोवणी पुलिसांक केली.
दुबावीत आरोपी चलत येता आनी फलक पिंजून मुखार वता. तशेंच ओकोकेरो कुशीचोय फलक पिंजून चोगम रस्त्या वेल्यान साळगांवचे दिशेन वचत आशिल्ल्याचो प्रकार रस्त्या वेले सीसीटीव्ही फुटेजींत बंदिस्त जाल्लो.
ह्या फुटेजीच्या आदारान पुलिसांनी दुबाविताचो सोद घेतलो आनी ताका सांजवेळा कळंगूटे अटक केली. दुबाविता आड पुलिसांनी भादंसंच्या 295 अ, 153 अ आनी 327 कलमा खाला गुन्यांव नोंद केला.
पुलीस निरिक्षक राहूल परब हांच्या मार्गदर्शना खाला उपनिरिक्षक मंदार परब, वामन नायक, सर्वेश भंडारी, सहाय्यक उपनिरिक्षक उमेश पावसकार, कॉन्सटेबल महादेव नायक, तुषार रावत, सिध्देश नायक, नितेश गावडे, उत्कर्ष देसाय आनी वैभव कांबळी ह्या पंगडान ही कामगिरी केली. फुडलो तपास पुलीस अधिक्षक निधीन वाल्सन आनी उपअधिक्षक विश्वेश कर्पे हांच्या मार्गदर्शना खाला पुलीस करतात.
दुबावीत आरोपीन सोऱ्याचे घुंवळेंत फलक पिंजपाचो प्रकार केलो. दुबावीत पणजी बस स्टॅण्डा वेल्यान चलत आयलो आनी वाटेरूच पर्वरे रस्त्याचे कुशीक लायिल्लो श्रीराम प्राणप्रतिश्ठापन सुवाळ्याचे फलक पिंजीत तो कळंगूटे चलतूच गेलो. ताका पर्वरी पुलिसांनी कळंगूटे डॉल्फीन सर्कला कुशीक धरलो. दुबाविताच्या हातांत एक ट्रॉली बॅग आशिल्ली. ती ताणें पणजी बस स्टॅण्डा वेल्यान चोरिल्ल्याचो पुलिसांक दुबाव आसा. ते नदरेन पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
