भांगरभूंय | प्रतिनिधी
दुबावीत तरणाटेक न्यायालयीन कोठी
म्हापशें: पुंडलीकनगर, पर्वरे पुलीस रॉबर्ट जिपी वयल्या कर्मचाऱ्यांक धक्काबुक्की करून मोबायल फोन फोडपा सयत फातर मारून जिपीचेंय लुकसाण केलें. ह्या प्रकरणांत दुबावीत आरोपी अफरीन मेहबूब शेखाक (25, रा. भोम फोंडें) पुलिसांनी अटक केली आनी न्यायालयीन कोठयेंत धाडून दिली.
हो प्रकार फाटल्या शेनवारा 20 वेर सकाळीं 9 वरांच्या सुमाराक घडलो. पुंडलीकनगर पर्वरे नियोजन आनी सांख्यिकी खात्याचे कचेरे कुशीक भौशीक सुवातेर एका जोडप्या कडल्यान अश्लील प्रकार सुरू आशिल्ल्याची कागाळ थळाव्या लोकांनी पुलिसांक दिल्ली.
ते प्रमाण रॉबर्ट क्र. 8 ही पुलीस जीप घडणूक थळार दाखल जाली. थंय एक जोडपें बशिल्लें. तांणी कागाळदार अक्षय पार्सेकार आनी हेरांनी थंय सावन वचपाक सांगलें. तेन्ना दुबावीत तरणाटेन ह्या पुलिसां कडेन वाद घालो. उपरांत ताणें कागाळदार पार्सेकार आनी ताचो वांगडी पुलीस कॉन्स्टेबल प्रसाद सावंत हांकां धक्काबुक्की केली.
उपरांत दुबावीत तरणाटेन पुलीस कॉन्स्टेबल प्रसाद मांद्रेंकाराचो मोबायल फोन झोमून जमनीर मारलो. तशेंच पुलीस जिपीचेर फातर मारले. हाका लागून मोबायल फोन तशेंच पुलिसांचे जिपीचें लुकसाण जालें. तशेंच पुलीस कर्मचाऱ्यांक कायदेशीर कर्तव्य करपाक आडखळ हाडली.
ह्या प्रकरणांत पर्वरी पुलिसांनी दुबावीत तरणाटेक ताब्यांत घेतल्या. तिचे आड भादंसंच्या 353, 504, 186 आनी 427 खाला गुन्यांव नोंद करून तिका अटक केली. दुबावीत तरणाटेक पुलिसांनी म्हापशें न्यायालयांत हजर करतकूच न्यायालयान तिका 14 दीस न्यायालयीन बंदखणींत दवरपाचो आदेश दिलो. ते प्रमाण पुलिसांनी तिची कोलवाळ बंदखणींतले न्यायालयीन कोठयेंत धाडून दिली. फुडलो तपास पुलीस निरिक्षक राहूल परब हांच्या मार्गदर्शना खाला हवालदार मदन तारी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
