भांगरभूंय | प्रतिनिधी
पणजी, बातमीदार : राज्यांत हालीं चोरयेचीं प्रकरणां वाडतूच आसात. चोर आतां सकाळचे लेगीत चोरी करपाक भियेनात. पर्वरेच्या राष्ट्रीय म्हामार्गाच्या कुशीक उबी केल्ले गाडयेंतल्यान ९५,६०० रुपयांचें भांगर, ४५ हजार रोख रक्कम मेळून वट्ट १.८० लाख रुपयांचें सामान चोरलें. हे विशीं पर्वरे पुलिसांनी अनवळखी आड गुन्यांव नोंद केला.
पर्वरे पुलिसांनी दिल्ले म्हायती प्रमाण, हे विशीं गोकाक – बेळगांवचे रोहित जोशी हांणी कागाळ दाखल केल्या. कागाळदार गोंयांत आयिल्लो. तो परत वचपाचो आशिल्लो. मजगतीं ताका न्हिद आयिल्ल्यान तांणी शेनवार ३ फेब्रुवारीक रातच्या १.३० ते सकाळीं ४ ह्या वेळार पर्वरेच्या राष्ट्रीय महामार्गाच्या कुशीक गाडी पार्क केली आनी तो गाडयेनूच न्हिदलो. तेन्ना तांणी गाडयेचें दार लॉक करूंक नाशिल्लें अशी म्हायती कागाळेंत नमूद आसा.
कागाळदार न्हिदिल्ल्या वेळार दुबावितान तो ९५,६०० रुपयांची एक मुदी, दोन कानांतलीं, एक नाकांतली रिंग, ४५ हजार रोख रक्कम, ४० हजार रुपयांचे दोन मोबायल मेळून१ लाख ८० हजार ६०० रुपया किमतीचें सामान चोरलें अशें कागाळींत नमूद केलां.
हाची दखल घेवन पर्वरी पुलीस निरीक्षक राहुल परब हांच्या मार्गदर्शना खाला उपनिरीक्षक वामन नायक हांणी दुबावितां आड भारतीय दंड संहितेच्या कलम ३७९ खाला गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
