भांगरभूंय | प्रतिनिधी
सतावणुके विशीं पर्यटकां कडल्यान मात एकाय कागाळीची नोंद ना
पणजी : पर्यटकांची सतावणूक जावपाचो आरोप विधानसभेंत विरोधकां सयत सत्ताधारी आमदारांनी केल्लो आसलो तरी पर्यटकां कडल्यान मात सतावणुकीची कागाळ नोंद जावंक ना. 1364 हो पर्यटन मजतवाहिनीचो नंबर आसा. हाचेर लेगीत एकूय कागाळ नोंद जावंक ना. पर्यटन मंडळा कडल्यान 448 पुलिसांची शिफारस आसतना सध्या फक्त 112 पुलीस आसात.
आमदार विजय सरदेसाय हांच्या लेखी प्रस्नाक पर्यटन मंत्री रोहन खंवटे हांणी ही लेखी जाप दिल्या. पुलिसां कडल्यान वा हेरां कडल्यान सतावणूक जाता अशी एकूय कागाळ पुलीस स्टेशनार नोंद जावंक ना. पर्यटना खातीर सरकारान 1364 ही मजतवाहिनी सुरू केल्या. ह्या मजतवाहिनीचेर लेगीत एकूय कागाळ येवंक ना अशें जापेंत नमूद केलां.
आयआरबीचे पुलीस जवान सध्या पर्यटक पुलीस म्हूण काम करतात. राज्यात सध्या 112 पर्यटन पुलीस आसात. हातूंतले 62 पुलीस उत्तर गोंयांतल्या दर्यादेगांचेर ड्युटी करतात. दक्षीण गोंयांतल्या दर्यादेगांचेर एकूय पुलीस ना. फाटल्या वर्सा गोंय पर्यटन म्हामंडळाची बसका जाली. पर्यटना खातीर 448 पुलिसांची गरज आसा अशी शिफारस मंडळान केल्ली. 200 पुलिसांची जाता तितली बेगीन भरती करची असो प्रस्ताव मंडळान सादर केल्लो. हो प्रस्ताव सरकाराक सादर जाला.
पर्यटन हो राज्याचो मुखेल वेवसाय आसा. येरादारी पुलिसां कडल्यान पर्यटकांची सतावणूक जाता, असो आरोप खूबशा आमदारांनी केल्लो. आमदार मायकल लोबो, डिलायला लोबो, युरी आलेमांव हे ह्या विशयाचेर बरोच तेप उलयिल्ले. सतावणूक जाता आसली तरी पर्यटक कागाळ करपाक फुडें येनात, असो हाचो अर्थ जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
