परदेशांत हिंदू आड दुस्वास वाडटा

भांगरभूंय | प्रतिनिधी

न्यूयाॅर्कः परदेशांतल्या हिंदूं कडेन जावपी दुस्वास आनी भेदभाव आजूनय थांबना. अमेरिकेंत हालींच्या वर्सांनी हिंदू धर्म आनी हिंदूं आड दुस्वास वाडत आसा. ते खातीर सोशल मिडियाचो वापर जाता. अमेरिकेंत 33 लाखां वयर हिंदू आसात. सुमार 99% अमेरिकेंत हिंदू स्थलांतरीत आनी स्थलांतरीत लोकांचीं भुरगीं आसात. आनीक 10% लोकांनी हिंदू धर्म आपणायला. अमेरिकेचे उदरगतींत हेर खंयच्याय समाजा परस हिंदू लोकांनी चड योगदान दिलां, कारण तें वट्ट लोकसंख्येचे फकत 1 टक्के आसात. भोवसंख्य वाद आनी परंपरीक संबंद हांचेर तांचो विस्वास आसा. तरी लेगीत प्रस्न उप्रासता, हिंदूं आड दुस्वास आनी कट कित्याक?
हे विशीं कास्ट फाइल्सच्या ऋचा गौतम हांणी, हिंदू लोकां मदीं जाती विशीं चुकीचो समज आसा. ऋचा आपल्या संघटनेच्या कास्ट फायलीं वरवीं हिंदू लोकां वांगडा हेर समाजांक समजून घेवपाचें आनी आदर करपाचें वातावरण वाडोवपाचेर लक्ष केंद्रीत करता. ताणें दुस्वासा आड कास्टकॉन कार्यावळ घडोवन हाडली. हातूंत 300 लाखां परस चड लोकांचो आस्पाव आसलो. हेर शेंकड्यांनी लोकांनी ऑनलायन हे कार्यावळींत वांटो घेतलो.
हिंदू ऍक्शनाचे कार्यकारी संचालक उत्सव चक्रवर्ती हांणी सांगलें, सोशल मिडियाचेर हिंदूं आड पातळिल्ल्या दुस्वासाच्या फाटल्यान आतंकवादी संघटणा आसात. त्यो भारत आनी हिंदू आड आसा. तशेंच एसबी 403 नांवाचें सक्रीय सोशल मिडिया हँडलूय आसा. रुतगर्स विद्यापिठांत केल्ल्या अभ्यासांत, हिंदूंचीं पवित्र प्रतीकां आनी प्रथा मुद्दाम आनी चुकीचे रितीन बदनाम करतात हें तातुंतल्यान दिसून येता. केशरी रंग, स्वस्तीक, गंध वा टिकली अशीं हेर चिन्नां अपमानी रितीन वापरतात, अशेंय तांणी सांगलें.