परत फॉर्मालिन नुस्त्याचेर चर्चा
भांगरभूंय | प्रतिनिधी
क्युसीआय सयत एफडीए सुद्दा करतलें तपासणी
पणजी : भायल्यान जें नुस्तें येता, ताची नेमान फॉर्मालीन चांचणी जावपाक जाय, अशी मागणी आमदार वेंझी व्हिएगस हांणी केली. नुस्त्याची सध्या क्युसीआय वरवीं तपासणी जाता. क्युसीआय सयत एफडीए लेगीत आकस्मीक नुस्त्याची चांचणी करतलें, अशें अन्न आनी वखदां मंत्री विश्वजीत राणे हांणी सांगलें.
राज्यांत कॅन्सराच्या दुयेंसाचें प्रमाण वाडत आसा. कॅन्सराच्या दुयेंसाचो फॉर्मालिन कडेन संबंद आसा. हाका लागून नुस्त्याच्या तपासणी कडेन सरकार आडनदर करपाक शकना, असो मुद्दो आमदार व्हिएगस हांणी मांडलो.
चेक नाक्याचेर तपासणी केंद्र घालपाची मागणी वेंझी व्हिएगस हांणी केली. क्युसीआय जी नुस्त्याची तपासणी करता, ताचेर सरकारान विसंबून रावचें न्हय, अशें तांणी सांगलें.
पयलीं अन्न आनी वखदां प्रशासन (एफडीए) नुस्त्याची फॉर्मेलिन खातीर तपासणी करताले. एफडीएच्या चांचणी अहवालाचेर कांय जाण दुबाव घेवपाक लागले. हाका लागून फॉर्मलिनाची चांचणी करपाची जापसालदारी क्युसीआय कडेन दिली. गोंयकारांक फॉर्मेलीन मुक्त नुस्तें मेळचें, हाची जापसालदारी सरकाराची आसा. आतां ह्यान फुडें एफडीए सुद्दा नुस्त्याची तपासणी करतलें, अशें मंत्री विश्वजीत राणे हांणी सांगलें.
मडगांव मार्केटांत फॉर्मेलीन तपासणी खातीर प्रयोगशाळा स्थापन करपाचो प्रस्ताव आशिल्लो. ताचें कितें जालें? असो प्रस्न आमदार विजय सरदेसाय हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
