भांगरभूंय | प्रतिनिधी
उमेदवार प्रशिक्षण येवजणेंत फकत 1200 उमेदवारांची नोंदणी
पणजी : उमेदवार प्रशिक्षण येवजणेंत सध्या सरकारी खात्यांत प्रशिक्षण घेवपाच्यो 2,700 आनी खाजगी क्षेत्रांत 4,885 संदी आसात. पूण गोंयच्यान फकत 1200 उमेदवारांनी सरकारी खात्यांत प्रशिक्षण घेवपा खातीर नोंदणी केल्या. 15 जुलय मेरेन गोंयांतले 10 हजार बेरोजगार लोक प्रशिक्षण येवजणेंत वांटो घेतले हे खातीर सगळ्यांनी यत्न करचो. हे येवजणेंत बेरोजगारांक व्हड प्रमाणांत नोंदणी करपा खातीर फुडाकार घेवपाचें आवाहन मुख्यमंत्री प्रमोद सावंत हांणी पंच, सरपंच हांकां केलां.
ही एक वर्साची येवजण. ज्या लोकांनी आपलें शिक्षण अर्धवट सोडलां वा शिक्षण पुराय केलां तांणी उमेदवार प्रशिक्षण येवजणेचो लाव घेवचो, जाका लागून तांकां कुशळटाय विकास प्रशिक्षण मेळटलें अशें मुख्यमंत्र्यान सांगलें.
मुख्यमंत्री अप्रेंटिसशिप कार्यावळी वरवीं सरकारी आनी खाजगी क्षेत्रांत दरेकीं 5 हजार म्हळ्यार वट्ट 10 हजार अप्रेंटिसशिप संदी आसात. खाजगी क्षेत्रांतय नोकरेच्यो संदी आसात. बऱ्या प्रमाणांत प्रशिक्षीतांक स्टायफंड दिवपाची तजवीज येवजणेंत आसली तरी खाजगी क्षेत्रांत तांकां चड स्टायफंड मेळपा वांगडाच नोकरीची संद मेळूंक शकता अशें मुख्यमंत्र्यान सांगलें.
सिप्ला, लुपिन सारकिल्ल्यो कंपनी दरेकीं शंभर अप्रेंटिसशिप संदी दिवपाक तयार आसात. निमाणे हे प्रशिक्षण येवजणेंतल्यान उमेदवारांक मेळटलें तें प्रमाणपत्र केंद्रीय कुशळटाय विकास मंत्रालयाचें आसतलें.
सगळी यंत्रणा बरी चलत जाल्यार फकत 10 हजारांक न्हय तर ताचे परस चड उमेदवारांक प्रशिक्षण येवजणेचो लाव मेळूं येता. हे येवजणेंत दरेक पंचायतीन शंभर उमेदवारांक नोंद करपाक फुडाकार घेतलो जाल्यार गोंयांत शिकून कोणूच घरांत उरचो ना. आपल्या वाठारांतल्या तरणाट्यांक हे येवजणेंत नोंदणी करची अशें आवाहन मुख्यमंत्र्यान पंच वांगड्यांक तशेंच सरपंचांक केलां. 15 जुलय सावन गोंयांत अप्रेंटिसशिप येवजण सुरू जातली.
बेगीनूच ‘शिका आनी कमवा’ येवजण गोंयांत सुरू जातली. तरणाट्यांक काम करून शिकपाची आनी शिकतना काम करपाची संद मेळची म्हणून राज्य सरकार ही नवी येवजण चालीक लावपाचें आसा अशें मुख्यमंत्र्यांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
