भांगरभूंय | प्रतिनिधी
पणजी : नोटिशी धाडूनूय पर्यटन खात्या कडेन नोंदणी करूंक नाशिल्ल्या 300 हॉटेलांचेर सरकार कारवाय करतलो, अशें पर्यटन मंत्री रोहन खंवटे हांणी स्पश्ट केलां. उत्तर गोंयांतल्या 188 जाल्यार दक्षीण गोंयांतल्या 113 हॉटेलांनी पर्यटन खात्या कडेन नोंदणी करूंक ना. ह्या हॉटेलांची विजेची जोडणी आनी उदकाची जोडणी तोडपाची कारवाय जातली.
आमदार क्रुज सिल्वा हांच्या प्रस्नाचेर हॉटेलांची नोंदणी आनी बेकायदो पर्यटन वेवसायाचेर चर्चा जाली.
पर्यटन खात्या कडेन 5 ऑनलायन ट्रॅवल एजंटांची नोंदणी आसा. ज्या ऑनलायन ट्रॅवल एजंटांची नोंदणी ना, तांचेर कारवाय जातली.
केपीएमजी संस्थेन तयार केल्ल्या अहवालाची कारवाय पर्यटन खात्यान सुरू केल्या. हॉटेल नोंदणी ऑनलायन सुरू केली आनी कागदपत्रांचो आंकडो उणो केलो. हाचे उपरांत हॉटेलांची नोंदणी वाडली. हॉटेल नोंदणींतल्यान एका वर्सांत 82 लाखांची येणावळ सरकाराक आयल्या. पर्यटकांची म्हायती मेळोपा खातीर खात्यान आतां हॉटेलांनी टायम सॉफ्टवेरची कारवाय सुरू केल्या, अशें पर्यटन मंत्र्यांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
