नुस्त्याच्या उत्पादनांत अंदूं विक्रमी वाड

भांगरभूंय | प्रतिनिधी

पणजीः गोंयांत नुस्ताच्या उत्पादनांत अंदूं  व्हड प्रमाणांत वाड जाल्या. 2021- 22चे तुळेंत 2022-23त 24,152 टन नुस्तें चड मेळ्ळां. फाटल्या पांच वर्सांच्या काळांतलें हें विक्रमी नुस्तें उत्पादन थारलां. आमदार व्हेंझी व्हिएगस हांणी विधानसभेंत विचारिल्ल्या लेखी प्रस्नाक नुस्तें उद्देग मंत्री नीळकंठ हळर्णकार हांणी दिल्ले जापेंतल्यान ही म्हायती उजवाडाक आयल्या.

2020-21त गोंयांतलें नुस्तें उत्पादन 1,11,484 टन इतलें आशिल्लें. 2021-22त तातूंत 4,542 टनांची वाड जाली. त्या वर्सा 1,16,126 टन नुस्तें मेळ्ळें. पूण अंदूं तातूंत 24,152 टनांनी वाड जावन 1,40,278 टन नुस्तें उत्पादन मेळ्ळां, अशें मंत्री हळर्णकार हांणी लेखी जापेंत म्हणलां.

मजगतीं, दर्या आनी जमनी वयल्या अशा दोनूय प्रकारांतल्या नुस्तें उत्पादनांत अंदूं व्हड वाड जाल्या. अंदूं दर्यांतल्यान 1,33,970 टन नुस्तें मेळ्ळें. पोरूंचे तुळेंत हें उत्पादन 23,246 टन अदीक आसा. जाल्यार जमनी वयल्या उदकांत 6,308 टन उत्पादन मेळ्ळें. पोरूंचे तुळेंत हें उत्पादन 906 टन अदीक आसा, अशें मंत्री हळर्णकार हांणी सादर केल्ले आंकडेवारींतल्यान दिसता.

बंदी काळांत नुस्तेमारी आडावपा खातीर गस्त

नुस्तेमारी बंदीच्या काळांत गोंयचे अखत्यारीत येवपी दर्यांत येवन नुस्तेमारी करपी महाराष्ट्र, कर्नाटकांतल्या ट्रॉलर्सांक आडावपा खातीर खात्यान कसल्यो उपाय येवजण्यो केल्यात, असोय प्रस्न व्हेंझी व्हिएगस हांणी विचारिल्लो. ताचेर लेखी जापेंत म्हणलां, दर्यादेग दळाचे जवान हे परिस्थितीचेर नदर दवरून तांचे वरवीं गस्त सुरू आसा.

63,333 टन नुस्त्याची विदेशांत निर्गत

अंदूं गोंयांत सांपडिल्ल्या नुस्त्यांतलें 63,333 टन नुस्तें हेर देशांनी निर्गत केलें. हें नुस्तें वाणिज्य आनी उद्देग मंत्रालया खाला येवपी दर्या उत्पादनां निर्गत उदरगत प्राधिकरणा वतीन निर्गत केलें, अशें मंत्री हळर्णकार हांणी क्रूज सिल्वा हांच्या प्रस्नाक दिल्ले लेखी जापेंत म्हणलां.