भांगरभूंय | प्रतिनिधी
मडगांव: नुव्यां म्हामार्गार सिग्नल उबारल्यात. पूण हे सिग्नल बंद आशिल्ल्यान अपघातांनी वाड जायत आसा. राजी मोटर्स जंक्शना कडले सिग्नल कांय दीस सुरू आसतात आनी परतून बंद जातात. ह्या प्रकाराक लागून वाहन चालकांक अपघातांत आपलो जीव व्हगडावचो पडटा. ह्या सिग्नलाची ताकतिकेन दखल घेवन आनी ते परतून सुरू करचे अशी मागणी नुवेंच्या नागरिकांनी भौशीक बांदकाम खात्याच्या अभियंत्या कडेन निवेदना वरवीं केल्या.
पिओ बार्रेटो, झरिना डिकुन्हा, अरवींद केनेथ बी नागरिकांनी बिरेस्तारा भौशीक बांदकाम खात्याचे अभियंते दत्तप्रसाद कामत हांकां निवेदन सादर केलें. उपरांत पिओ बार्रेटो हांणी सांगलें, नुवें गांवांतल्यान वचपी म्हामार्गा वयले सिग्नल फाटले कितलेशेच म्हयने बंद आसात. सेगीत मागणी करून लेगीत हे सिग्नल सुरू केल्ले नात.
ह्या मार्गार अपघातांत वाड जाल्या. कांय चालकांक आपलो जीव लेगीत व्हगडावचो पडला. अभियंतो कामत हांकां निवेदन सादर करून सिग्नल बेगीन सुरू करपाची तशेंच येरादारी पुलिसांची नेमणूक करपाची मागणी केल्या. सिग्नल सुरू करपाचें आस्वासन अभियंतो कामत हांणी दिलां. येरादारी खातें, जिल्होधिकारी कार्यालयांतूय हे विशीं निवेदन सादर करतले अशें बार्रेटो हांणी सांगलें.
नुव्यां म्हामार्ग केला. पूण सिग्नल बंद आसात. थळाव्यांक अपघातांक सामकार वच्चें पडटा. हाचेर सरकारा कडल्यान उपाय येवजण करपाची गरज आसा. विकासाच्या नांवा खाला लोकांच्या जिवा कडेन खेळचे न्हय अशें सलीम गोम्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
