नावेली रोझरी कॉलेजींत उसरां येवपी विद्यार्थ्यांक दिताले दंड
भांगरभूंय | प्रतिनिधी
वेळार येवपाची शिस्त लागचे खातीर निर्णय : प्रा. हेलीक बार्रेटो
मडगाव : नावेलीच्या रोझरी म्हाविद्यालयांत फाटल्या कांय दिसां सावन उसरां पावपी विद्यार्थ्यां कडल्यान 50 रुपयांचो दंड घेवन तांकां भितर प्रवेश दिता. कॉलेजींत प्रवेशा खातीर पयशे घेतिल्ल्याचो व्हिडिओ व्हायरल जाल्या उपरांत ही बेकायदो दंडवसुली बंद केली.
कॉलेज प्रशासनान उसरां येवपी भुरग्यांक शिस्त लागपा खातीर दंड दिलां अशी म्हायती दिली.
रोझरी म्हाविद्यालयांत थारावीक वेळ परस 15 मिनिटांचो उशीर जाल्यार कॉलेजींत प्रवेश घेवपा खातीर 50 रुपयांचो दंड घेतात. उसरां येवपी विद्यार्थ्यांक गेटी भायरूच आडायताले. भितर प्रवेश जाय जाल्यार 50 रुपयांचो दंड सुरक्षा रक्षकाच्या हातांत दिवन तांणी दिल्ल्या कागदाचेर नांव बरोवंचें पडटालें. दंडाचो व्हिडिओ दोन दिसां पयलीं व्हायरल जाल्लो. उपरांत कॉलेज प्रशासनाक हे विशीं विचारलें तेन्ना हें दंड आकारप बंद जालें.
विद्यार्थ्यांक कॉलेजींत प्रवेश दिवपाक अशे तरेन दंड वसूल करप बेकायदेशीर. युनिव्हर्सिटीनूय हे विशीं कसलेच तरेचे निर्देश दिवंक ना. तरीय कॉलेज अशे तरेन बेकायदेशीरपणान पयशांची वसुली केल्ल्याचें व्हिडिओंत दिसता.
प्राचार्य हेलीक बर्रेटो हांणी, अंदूं म्हाविद्यालय सुरू जाल्ल्याक कसलेंच म्हत्वाचे कारण नासतना विद्यार्थी उसरां कॉलेजींत येतात. उसरा प्रवेश करपी विद्यार्थ्यांची वाड जायत आसा. भुरग्यांनी वेळार येवप कितलें गरजेचें, हें तांकां कळचें देखून विद्यार्थ्यांक कडल्यान दंड भरुन घेवपाची पद्दत सुरू केल्या. हे विशीं विद्यार्थ्यांक आनी तांच्या पालकांक कळयल्लें. सुरक्षारक्षक भुरग्यां कडल्यान पयशे घेवन, तांचीं नांवा बरोवन तीं कार्यालयांत जमा करतालो. दरेकल्याक वेगळी पावती दिनासतना पुराय दिसाची एकूच पावती तयार करताले. भुरग्यांनी वेळार येवपाक सुरवात केल्या उपरांत ते पयशे तांकां परत दिवपाक आसले. भुरग्यांक परिक्षेक बसपा खातीर 75 टक्के हाजेरी गरजेची. तांचे लॅक्चर चुकचे न्हय आनी तांणी वेळाची शिस्त पाळचे खातीर दंड घेतिल्लो. कॉलेजीन घेतिल्लो निर्णय तांच्या बर्या खातीर आशिल्लो अशें तांणी म्हणलें.
फा. गॅब्रियल कुतिन्हो हांणी, कॉलेजीन घेतिल्लो निर्णय पालक आनी भुरग्यांकूय सांगिल्लो. कोणाचोच हाका विरोध नाशिल्लो. सदांच उसरां येवपी भुरग्यांक वेळाची शिस्त लागचे खातीर फाटल्या कांय दिसां सावन दंड घताले. कॉलेजीचे अशे व्हिडिओ करून ते व्हायरल करप, कॉलेजीचें नांव पिड्ड्यार करप, ही वायट गजाल आशिल्ल्याचें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
