भांगरभूंय | प्रतिनिधी
पणजी ः नवी दिल्लींतल्या कर्तव्य पथाचेर 26 जानेवारीक जावपी प्रजासत्ताक दीस संचलनाच्या दोन दिसां आदीं गोंय राज्याचो चित्ररथ केंद्रीय संरक्षण मंत्रालयान नवी दिल्लीच्या 23 ते 31 जानेवारी मेरेन आयोजीत केल्ल्या “भारत पर्व” उत्सवांत प्रदर्शीत करतले. ‘विविधतायेत एकता’ ह्या भारतीय भावनेचो सुवाळो मनोव पाखातीर “भारत पर्व” उत्सवाचे आयोजन केलां. ह्या देशभक्तीच्या उत्सवांतल्यान देशाचे संस्कृतीचें दर्शन घडटलें.
प्रजासत्ताक दीस सुवाळ्याचो एक भाग म्हूण 2016 वर्सा सावन नवी दिल्लीत “भारत पर्व” उत्सवाचे आयोजन करतात. ह्या संचलनातल्यान भारतीय सांकृतीक वारश्या सयत देशान संरक्षण, उद्देग, पर्यटन, विज्ञान आनी हेर साबार मळार केल्ले उदरगतीचें दर्शन घडटा. संचलनात जावपी सांस्कृतीक वारश्याचें प्रदर्शन म्हणल्यार देशाच्या एकतेचे प्रतीक जावन आसा. दरेक वर्सा प्रजासत्ताक दिसा कर्तव्य पथार राष्ट्रपती भवन ते इंडिया गेट, लाल किल्लो अशें संचलन जाता. प्रजासत्ताक संचलनात वांटेकार जावपी चित्ररथ, सांस्कृतीक कार्यावळी आनी कवायतींची तयारी आनी तालीम एका म्हयन्यासावन सुरू जाता.
णव दिसांच्या “भारत पर्व” उत्सवांत गोंयचो चित्ररथ प्रदर्शीत करपा खातीर फोंडेचे कलाकार सुशांत खेडेकार हांची राज्य सरकारान निवड केल्या. गोंयचो चित्ररथ विकसीत गोंय, विकसीत भारत ह्या संकल्पनेचेर आदारीत आसून तपलोका योग क्षेत्र, गोंयची दर्या संपत्ती, जल जीवन मिशन आनी हेर वारशाचें दर्शन घडयतले. गोंयचो चित्ररथ तयार करपाचे काम नवी दिल्लीत राष्ट्रीय रंगशाळा शिबिरांत नेटान चालू आसा. खेडेकार हांच्या देखरेखीखाला 40 कलाकार चित्ररथ तयार करपाचें काम करतात. 22 जानेवारी मेरेन काम पुराय जातलें.
संरक्षण मंत्रालयान ह्या वर्सा लाल किल्ल्या सामकार जावपी “भारत पर्व” उत्सवात आपलो चित्ररथ प्रदर्शीत करपा खातीर गोंयासयत आसाम, कर्नाटक, उत्तराखंड, त्रिपुरा, हिमाचल प्रदेश, जम्मू आनी काश्मीर राज्यांक आमंत्रीत केला. “भारत पर्व” उत्सवात चित्ररथ प्रदर्शना सयत अन्न उत्सव, हस्तकला मेळा, लोकनाच आनी हेर कार्यक्रम जातले. उत्सवाच्या काळात लाल किल्ल्याचेर रोशणाय करपात येतली.
ह्या वर्सा प्रजासत्ताक दीस संचलनात देशांतल्या सोळा राज्यांचो वांटो आसतलो, जातूंत आंध्रप्रदेश, अरूणाचल प्रदेश, हरयाणा, छत्तीसगड, गुजरात, झारखंड, मध्यप्रदेश, महाराष्ट्र, मणिपूर मेघालय, ओडिसा, राजस्थान, तामिळनाडू, तेलंगणा, उत्तर प्रदेश राज्यांसयत लढाख संघप्रदेशाचो आस्पाव आसा.
गोंय सरकाराच्या म्हायती आनी प्रसिध्दी खात्या वतीन गोंयच्या चित्ररथाचें प्रदर्शन जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
