भांगरभूंय | प्रतिनिधी
मुख्यमंत्रीः राजकी सुवार्था खातीर विरोधकांचो जाता विरोध
भांगरभूंय प्रतिनिधी
पणजीः गोंयांत लागू अाशिल्लो समान नागरी कायदो देशभर लागू जावपाची गरज आसा. जातीधर्माच्या आदाराचेर भेदभाव नाका. जल्म नोंद, लग्न नोंद, मालमत्ता हक्क हे खातीर एकूच समान नागरी कायदो पुराय देशांत जाय, अशें मत मुख्यमंत्री डॉ. प्रमोद सावंत हांणी उक्तायलें. नवभारत निर्मणे खातीर समान नागरी कायदो गरजेचो आशिल्ल्याचेय तांणी म्हणलें.
पणजे एका राष्ट्रीय खबरां चॅनेलाक दिल्ले मुलाखतींत मुख्यमंत्री उलयताले. गोंयांत जायत्या वर्सां पसून समान नागरी कायदो लागू आसा. ताका लागून प्रशासनांत कसल्योच अडचणी येनात वा कोणाचोच हाका विरोध जायना. मात कांय राजकी पक्षां खातीर समान नागरी कायदो हो राजकी सुवार्थाचो मुद्दो निश्चीत जावपाक शकता, अशें मुख्यमंत्री डॉ. सावंत हांणी म्हणलें. तशेंच गोंयांत समान नागरी कायदो लागू करप शक्य आसा जाल्यार देशांतूय हो कायदो लागू करप शक्य आसा, अशेंय तांणी म्हणलें.
गोंयांत ‘एससीओ’ आनी ‘जी 20’ च्या सगल्या परिशदांचे आयोजन करून अांतरराष्ट्रीय पांवड्यार गोंयच्या पर्यटनाक व्हेल्या. योग्य नियोजन केल्ल्यान पांच जी 20 बसका येसस्वी रितीन पुराय जाल्यात. हाचो फायदो निश्चीत गोंयाक जाता. जी 20 खातीर गोंयांत खाजगी पांच नकेत्री हॉटेलांचो वापर जालो. पूण फुडल्या काळांत अांतरराष्ट्रीय बसकां खातीर राज्य सरकारा कडल्यान पीपीपी तत्वाचेर सेव्हन स्टार कन्व्हेन्सन सेंटराची बेगिनूच उबारणी करतले. तशेंच पर्यटन खातें आनी केंद्राच्या सहकार्यांतल्यान एक ल्हान कन्व्हेंन्शन सेंटर 6 म्हयन्यांत उबारतलें, अशें मुख्यमंत्र्यांनी सांगलें.
——————–
कर्नाटकाची पुनरावृत्ती देशांत जावची ना
कर्नाटकांत परिवर्तन जाले म्हूण देशांत परिवर्तन जावचे ना. फाटलीं 9 वर्सां प्रधानमंत्री नरेंद्र मोदी सगल्या घटकां खातीर कार्यरत आसात. 2047 तल्या विकसीत भारताचें सपन सत्यात हाडपाक ते यत्न करतात. लोकसभा वेंचणुकेंत गोंयांतल्यो दोनूय सुवातो भाजपाच जिखतलो. कर्नाटकांत विधानसभा वेंचणुकांनी सुवातो उणो मेळ्ळ्यो, पूण लोकसभेंत भाजप आघाडेर आसतलो. महाराष्ट्रांतूय भाजपाकूच चड सुवातो मेळटल्यो, असो विस्वास मुख्यमंत्र्यांनी उक्तायलो.
संस्कृतीची जतनाय जावप गरजेचें
गोंय मुक्त जावन 60 वर्सां जाल्यात. गोंयाक जायत्या वर्सांचो इतिहास आसा. गोंयांतली संस्कृती मुखार येवपाची गरज आसा. पर्यटकांक दाखोवपाक आनी फुडले पिळगे खातीर गोंयच्या संस्कृतीची जतनाय करप गरजेचें. पुर्तुगेजांच्यो खाणोखुणो मिटोवप हाचो अर्थ एकाद्या समाजाक लक्ष्य करप असो जायना. सरकार फक्त संस्कृती संवर्धनाचो यत्न करता. ताका लागून कोणाक वायट दिसपाची गरज ना, अशेंय मुख्यमंत्री डॉ. सावंत हांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
