धुळापींतलें श्री सांतेरी रवळनाथ देवूळ मोडपाच्या आदेशाक सुप्रिम कोर्टाची स्थगिती

भांगरभूंय | प्रतिनिधी

पणजी ः धुळापी – खोर्लेचे (तिसवाडी) श्री सांतेरी रवळनाथ देवस्थान समितीन पोरणें देवूळ मोडून नवे देवूळ बांदलें. ते बांदकाम बेकायदेशीर आशिल्ल्यान तीन म्हयन्यांत ते जमीनदोस्त करपाचे आदेश मुंबय उच्च न्यायालयाच्या गोंय खंडपिठान खोर्ली पंचायतीक दिल्लो. ह्या आदेशाक आयज सर्वोच्च न्यायालयान स्थगिती दिली. तशेंच बांदकाम आशिल्लें तशें दवरपाचोय आदेश दिलो.
ह्या प्रकरणांत धुळापी- खोर्लेच्या श्री सांतेरी रवळनाथ देवस्थान वेवस्थापन समितीन सर्वोच्च न्यायालयांत आव्हान याचिका दाखल केल्ली. तातूंत तांणी राज्य सरकार, पंचायत संचालनालय, पंचायत उपसंचालक, मुखेल नगरनियोजक, उपनगरनियोजक, तिसवाडी मामलेदार, खोर्ली पंचायत, गट उदरगत अधिकारी, निळू धुळापकार हांच्या सयत हेरांक प्रतिवादी केल्यात. सर्वोच्च न्यायालयान आयज हे याचिकेचेर सुनावणी करतना वयलो आदेश दिला.
देवस्थान समितीचो सर्वेक्षण क्र. 32/1 चे जमनींत आशिल्लें पोरणें देवूळ मोडून नव्या देवळाचें बांदकाम सुरू जालां असो दावो करून प्रतिवादी निळू धुळापकारान मुंबय उच्च न्यायालयाच्या गोंय खंडपिठात याचिका दाखल केल्ली. तातूंत तांणी वयल्या मुद्द्यां वांगडा बांदकामाक परवानगी ना असो दावो केला. हे संबंदी धुळापकार हांणी 13 ऑक्टोबर 2022 दिसा खोर्ली पंचायती कडेन कागाळ केल्ली. ते प्रमाण पंचायतीन 14 ऑक्टोबर 2022 दिसा पळोवणी करुन संबंदीत बांदकाम बंद दवरपाची नोटीस जारी केली.
हे नोटीसेक देवस्थान समितीन पंचायत संचालकाक आव्हान दिलें. त्या वेळार वयल्या नोटीसीक कसलोच आदेश दिवंक नाशिल्लो. ते उपरांत धुळापकार हांणी 29 नोव्हेंबर 2022 दिसा गट उदरगत अधिकाऱ्या कडेन कागाळ दाखल केली. उपरांत याचिकादारान मुखेल सचिवा कडेन कागाळ दाखल केली. मजगतीं बांदकाम सुरू जालें आनी पुराय जालें. हे संबंदी सरकारी पांवड्यार कांयच घडनाशिल्ल्यान धुळापकार हांणी खंडपिठात याचिका दाखल केल्ली. ह्या संबंदीत सुनावणी खंडपिठांत चालू आसतना देवूळ बांदपाच्या विशया वयल्यान दोन गट तयार जाले. ह्याच कारणाक लागून मार्च 2023 वर्सा नवी मूर्त स्थापन करपाक हाडली तेन्ना व्हड वाद निर्माण जालो. सरकारी वेवस्थेन हस्तक्षेप करून दोनूय गटां मदीं बसका घेतली आनी ही मूर्त मंडपांत दवरपाची सुचोवणी केली. तशेंच खंडपिठाच्या निर्णया मेरेन आसा तशेंच दवरपाची सुचोवणी केल्ली. उपरांत दोनूय पक्षांची सुनावणी घेतले उपरांत खंडपिठान उल्लेख केल्ले बांदकाम बेकायदेशीर आशिल्ल्यान ते 7 नोव्हेंबर 2023 दिसा तीन म्हयन्यां भितर मोडपाचो आदेश दिलो. हाका देवस्थान वेवस्थापन समितीन सर्वोच्च न्यायालयांत आव्हान दिलां.
पंचायतीक दिल्ल्या वेळा भितर बांदकाम मोडपाक मेळना जाल्यार एका म्हयन्या भितर ही जमीन मोडून उडोवपाचो आदेश खंडपिठान गट उदरगत अधिकाऱ्यांक जारी केल्लो. हाचे भायर बांदावळ मोडपा खातीर जाल्लो खर्च देवळ समिती कडल्यान वसूल करपाचोय आदेश दिलो. देवस्थान वेवस्थापन समितीन सर्वोच्च न्यायालयांत हाका आव्हान दिलां. सर्वोच्च न्यायालयान ह्या आदेशाक स्थगीत दिला.