भांगरभूंय | प्रतिनिधी
सालेलींत मोटारीन दिलो झाडाक धपको
पाटवळा झाड पडिल्ल्यान येरादारीची कोंयडी
वाळपय: सत्तरी म्हालांत फाटल्या 24 वरांत पडिल्ल्या पावसाक लागून लोकजीण विस्कळीत जाली. न्हंयांच्या उदकाची पातळी वाडली. अंजूणें धरणाचे पातळेंत वाड जावंक लागल्या. सोमारा रातीं उसरां धावें हांगा माड पडून दोन मोटारींचें व्हड प्रमाणांत लुकसाण जालें. जाल्यार मंगळारा दनपारां वाळपय-होंडा मार्गा वयल्या सालेली वाठारांत एका मारुतीन झाडाक धपको दिल्ल्यान मोटारीचें व्हड प्रमाणांत लुकसाण जालें.
24 वरांत घोग्यांनी पावस
फाटल्या 24 वरांत सत्तरी म्हालाच्या खूबशा वाठारांनी घोग्यांनी पावस पडत आसा. खास करून दोंगराळ वाठारांनी व्हड प्रमाणांत पावस पडत आशिल्ल्यान न्हंयांच्या उदकाचे पातळेंत वाड जावंक लागल्या. रातीं उसरां मेरेन पावस असोच पडत उरल्यार उदकाची पातळी वाडून हुंवार येवपाची परिस्थिती न्हयकारूं येना. हे खातीर आपत्कालीन वेवस्थापनान सत्तरी म्हालांतल्या न्हंयांची वाडटी पातळी पळोवन सतर्कतायेची शिटकावणी दिल्या. रातीं उसरां मेरेन सगल्या न्हंयांचे पातळेंत उदक वाडूंक लागिल्ल्यान खूबशा बागायतींनी उदक घुसून कांय प्रमाणांत लुकसाण जाल्ल्याची खबर आसा.
धाव्यां मोटारींचें लुकसाण
सोमारा रातीं उसरां धावें सत्तरी हांगा घरा कुशीक आशिल्लो माड वादळी वाऱ्यान पडून महादेव उसपकार (जीए 04 सी 5826) आनी विलास उसपकार (जीए 03 सी 7103) हांच्या मोटारींचें लुकसाण जालें. थळाव्यांनी दिल्ले म्हायती प्रमाण घरा कुशीक आशिल्लो माड वादळी वाऱ्यान अर्द्यारूच मोडून पडलो. हाका लागून शेजारा पार्क करून दवरिल्ल्या दोनूय मारुती मोटारींचेर तो पडिल्ल्यान मोटारींचें लुकसाण जालें.
मेळिल्ले म्हायती प्रमाण महादेव उसपकार हांच्या मोटारीचें सुमार 1 लाखाचें लुकसाण जालां जाल्यार उजो पालोवपी दळान सुमार 2 लाखांचो म्हालवज वाटायलो. विलास उसपकार हांच्या मोटारीचें सुमार 70 हजार रुपयांचे लुकसाण जालां. जाल्यार उजो पालोवपी दळान सुमार 50 हजार रुपयांचो म्हालवज वाटायलो.
सालेलींत मोटारीचो झाडाक धपको
वाळपय-होंडा मार्गा वयल्या सालेली वाठारांत एका मोटारीन झाडाक धपको दिल्ल्यान व्हड प्रमाणांत लुकसाण जालें. ही मोटार वाळपय सावन होंडा वताली. अचकीत हेडगीं गोरवां रस्त्यार आयिल्ल्यान तांकां वाटावपा खातीर चालकाचें मोटारी वेलें नियंत्रण सुटलें आनी मोटारीन उजवे वटेन आशिल्ल्या झाडाक धपको दिलो. हाका लागून मोटारीच्या दर्शनी भागाचें व्हड प्रमाणांत लुकसाण जालां. सुदैवान जिवीतहानी जाली ना. ह्या मोटारीचो धपको इतलो नेटाचो आशिल्लो की दर्शनी भागाचें व्हड प्रमाणांत लुकसाण जालां. हे विशींची म्हायती मेळटकूच पुलिसांनी रोखडीच घडणूक थळार धांव घेवन घडणुकेचो पंचनामो केलो.
मजगतीं, खूबशा सुवातांनी पडझड जाल्ल्याची खबर आसा. मंगळारा सकाळीं खोतोडें पंचायत वाठारांत पाटवळ हांगा मुखेल रस्त्यार झाड पडिल्ल्यान येरादारीची कांय प्रमाणांत कोंयडी जाली. उजो पालोवपी दळान रोखडीच धांव घेवन रस्त्यार पडिल्लें झाड कुशीक काडून येरादारी सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
