भांगरभूंय | प्रतिनिधी
30 परस चड चोरयांचो आस्पाव; कोंकण रेल्वे पुलिसांची कारवाय
मडगांव: धांवते रेल्वेंत चोरी प्रकरणांत कोंकण रेल्वे पुलिसांनी सद्या रावपी कारवार मूळ झारखंडचो नसीम उर्फ सलीम खान (56) ह्या चोराक अटक केली. पुलिसांच्या तपासांत चोरयेच्या भांगरा वस्ती सयत दुबावीत खाना कडल्यान 36 मोबायला सयत 14 लाख 30 हजारांचो म्हालवज जप्त केलो. तपासांत ह्याच दुबावितान कारवार ते गोंय प्रवासांत 30 परस चड चोरयो केल्ल्याचें सांगिल्ल्यान हो खांपो चोर आशिल्ल्याचें दिसून आयलें. दुबाविताक चार दिसांची पुलीस कोठी दिल्या.
कोंकण रेल्वे पुलीस अधिक्षक गुरूदास गावडे हांचे सयत उपअधिक्षक गुरूदास कदम हांणी पत्रकार परिशद घेवन कारवायेची म्हायती दिली. कागाळदार सुमिथा भट ह्यो 7 ऑगस्ट दिसा नेत्रावती एक्सप्रेस गाडयेन मंगळूरू ते करमळी असो प्रवास करताल्यो. ह्या प्रवासांत कागाळदारची पर्स चोरयेक गेली. तातूंत भांगराच्यो चार सरपळ्यो, दोन कांकणा, एक नॅकलेस, चार कानांतलीं, चार मुदयो असो 269 ग्राम वजनाच्या भांगारा वस्तीचो 7 लाख 46 हजार रुपया मोलाचो म्हालवज, चार हजार रुपया रोख, मोबायल असो सुमार 7 लाख 59 हजारांचो म्हालवज आशिल्लो.
ह्या प्रकरणांत कोंकण रेल्वे पुलिसांनी तपास करतना आर्टिफिशयल इंटेलिजन्सच्या माध्यमांतल्यान दुबावीत नसीम उर्फ सलीम खान ह्या 56 वर्सा पिरायेच्या दुबाविताक अटक केली. दुबावीत नसीम हो मूळ झारखंडचो आसून तो कारवारा रावतालो. तशेंच वास्कोंत लेगीत ताणें भाड्यान कूड घेतिल्ली.
दुबाविताक अटक केले उपरांत चवकशेंत ताचे कडलो चोरयेचो सगलो म्हालवज जप्त केलो. आल्त दाबोळे ताचे भाड्याचे कुडींतल्यान पुलिसांनी 36 विवीध प्रकारचे स्मार्टफोन जप्त केले. तशेंच पांच बायलांची बॅगां आनी आनिकूय भांगराच्यो वस्ती जप्त केल्यो.
दुबाविता कडल्यान आतां मेरेन पुलिसांनी 14 लाख 30 हजारांचो म्हालवज जप्त केला. कोंकण रेल्वे पुलीस अधिक्षक गुरूदास गावडे, उपअधिक्षक गुरूदास कदम हांच्या मार्गदर्शना खाला पुलीस निरिक्षक सुनील गुडलर हांचे सयत पुलीस पंगडान ही कारवाय केली.
3 म्हयन्यांत 30 परस चड चोरी
फाटल्या तीन ते चार म्हयन्यांत कारवार ते गोंय असो प्रवास करून दुबावीत नसीम उर्फ सलीम खान हाणें 30 परस चड चोरी धांवते रेल्वेंतल्यान केल्ल्याचें कोंकण रेल्वे पुलिसांच्या तापसांत मुखार आयलां. कारवार रेल्वे स्टेशनार मडगांवां येवपा खातीर मोटी शॉपींग बॅग घेवन दुबावीत गाडयेंत चडटालो. धांवते रेल्वेंत चोरी केले उपरांत त्या शॉपींग बॅगांत चोरयेचो म्हाल उडोवन सगल्यांची नदर चुकोवन म्हाल घरा व्हरतालो. असोच प्रकार तो मडगांव सावन कारवारा वतना करतालो अशें तपासांत मुखार आयलां. कोंकण रेल्वे पुलीस दुबाविता कडल्यान ताणें केल्ले चोरयेची म्हायती घेवन तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
